កាលពីថ្ងៃអង្គារ សភាជាតិរបស់ប្រទេសឥណ្ឌូនេស៊ី បានធ្វើការអនុម័តច្បាប់ ដើម្បីផ្លាស់ប្តូរដ្ឋធានី ពីហ្សាកាតា ទៅកាន់តំបន់ព្រៃជ្រៅ Kalimantan នៅលើកោះ Borneo ជំនួសវិញ ។
ជាក់ស្តែង បំណងនៃការផ្លាស់ប្តូររដ្ឋធានីនេះត្រូវបានធ្វើឡើង បន្ទាប់ពីថ្នាក់ដឹកនាំមរបស់ប្រទេសឥណ្ឌូនេស៊ី បានពិចារណាអំពីចំណាត់ការនេះ អស់រយ:ពេលជាច្រើនឆ្នាំមកហើយ ។
មិនតែប៉ុណ្ណោះ ដោយស្ថិតនៅក្រោមច្បាប់ថ្មី ដែលផ្តល់តាមសំណើរបស់ប្រធានាធិបតី លោក Joko Widodo នឹងត្រូវចំណាយរហូតដល់ ៣២ ពាន់លានដុល្លារ នៅក្នុងគម្រោងនេះ សម្រាប់ការអភិវឌ្ឍន៍រដ្ឋធានីថ្មី រួមទាំងការរៀបចំហិរញ្ញវត្ថុ និងអភិបាលកិច្ចផងដែរ ។
គួរឱ្យដឹងផងដែរថា ការផ្លាស់ប្តូររដ្ឋធានីថ្មីនេះ នឹងចាប់ផ្តើមពីចន្លោះឆ្នាំ ២០២២ ដល់ឆ្នាំ ២០២៤ ជាមួយផ្លូវ និងកំពង់ផែ ត្រូវបានសាងសង់ទុកជាមុន ហើយក្រសួងហិរញ្ញវត្ថុ បាននិយាយទៀតថា គម្រោងមួយចំនួន នឹងត្រូវដំណើរការជាភាពជាដៃគូសាធារណ: និង ឯកជន ។
ហ្សាកាតា ជាទីក្រុងដែលមានប្រជាជនប្រមាណ ១០លាននាក់កំពុងរស់នៅ ហើយវាបានទទួលបានផលប៉ះពាល់ជាច្រើន ដូចជាការរស់នៅដោយចង្អៀតណែន គ្រោះទឹកជំនន់ និងការបំពុលខ្យល់ជាដើម ស្របពេលអតីតប្រធានាធិបតីជាច្រើននាក់ ក៏ធ្លាប់បានពិចារណាផ្លាស់ប្តូររដ្ឋធានីផងដែរ ប៉ុន្តែរហូតមកទល់នឹងពេលនេះ គ្មាននរណាម្នាក់បានអភិវឌ្ឍចំពោះគំនិតនេះឡើយ ។
ដោយឡែកសម្រាប់អាណត្តិលោក Widodo វិញ គាត់បានធ្វើការប្រកាសពីផែនការរបស់ខ្លួនជាលើកដំបូង នៅក្នុងឆ្នាំ ២០១៩ ខណ:ផែនការនេះ ត្រូវបានពន្យាពេលដោយសារតែជំងឺរាតត្បាតកូវីដ ១៩ ។ ហើយចំពោះរដ្ឋធានីថ្មី ដែលត្រូវបានអនុម័តនៅលើកោះ Borneo នេះ នឹងត្រូវដាក់ឈ្មោះថា Nusantara ។
សូមបញ្ជាក់ផងដែរថា នៅមិនមានការបរិច្ឆេទច្បាស់លាស់ សម្រាប់ការបញ្ចប់គម្រោងនេះទេ ហើយហ្សាកាតា នឹងនៅតែជារដ្ឋធានីរបស់ប្រទេសឥណ្ឌូនេស៊ីដដែល រហូតដល់ពេលមានបញ្ជាពីប្រធានាធិបតី ដើម្បីធ្វើការផ្លាសប្តូរជាផ្លូវការតែប៉ុណ្ណោះ ៕
ប្រភព: Voanews
