ក្រោយបើកប្រទសឡើងវិញ មានទេសចរក្នុងស្រុកដើរកម្សាន្តជាង ៣លាននាក់ ខណៈរដ្ឋាភិបាលថាផ្តើមចេញពីកក្តាចំនួន ៤

ចាប់តាំងពីបើកប្រទេសនាខែវិច្ឆិកា ឆ្នាំ២០២១ មកទល់ខែមករានេះមានប្រជាពលរដ្ឋដើរលេងកម្សាន្តក្នុងស្រុកជាង ៣លាននាក់។ នេះបើតាមការគូសបញ្ជាក់របស់សម្តេច ហ៊ុន សែន នាយករដ្ឋមន្រ្តីកម្ពុជា ក្នុងពិធីបើកការដ្ឋានសាងសង់ស្ពានអាកាសឬស្សីកែវ តាមបណ្ដោយផ្លូវជាតិលេខ៥ ត្រង់ចំណុចប្រសព្វស្ពានឬស្សីកែវឆ្លងកាត់ទន្លេសាប នាព្រឹកថ្ងៃទី៣១ ខែមករានេះ។

សម្តេច ហ៊ុន សែន បានបញ្ជាក់ថា ការមានភ្ញៀវទេសចរណ៍ក្នុងស្រុកចេញដើរកម្សាន្តជាង ៣លាននាក់នេះ គឺផ្តើមចេញពីកម្ពុជាមានសន្តិភាព មានហេដ្ឋារចនាសម្ព័ន្ធតភ្ជាប់ មធ្យោបាយដឹកជញ្ជូនកើនឡើង និងប្រជាជនមានប្រាក់។

រយៈពេលមួយថ្ងៃ នៅថ្ងៃឆ្លងឆ្នាំសកល ២០២២ មានភ្ញៀវទេសចរសរុបជាង ១លាន១សែននាក់បានធ្វើដំណើរទៅកាន់តំបន់ទេសចរនានានៅទូទាំងប្រទេសកម្ពុជា ក្នុងនោះរាជធានីភ្នំពេញ និងខេត្តសៀមរាបមានអ្នកចូលទស្សនាច្រើនជាងគេបំផុត។ នេះបើតាមការឲ្យដឹងរបស់លោក ថោង ខុន រដ្ឋមន្ត្រីក្រសួងទេសចរណ៍។

លោក ថោង ខុន បានបញ្ជាក់បន្ថែមទៀតថា គ្រប់គោលដៅទេសចរណ៍ និងមូលដ្ឋានអាជីវកម្មទេសចរណ៍បានអនុវត្តវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដាអប្បបរមា (SOP) ក្រោមការចុះពិនិត្យ អប់រំ និងណែនាំពីរដ្ឋបាលរាជធានី-ខេត្ត មន្ទីរទេសចរណ៍ទាំង២៥រាជធានី-ខេត្ត៕