អភិបាលខេត្តព្រះសីហនុ លោក គួច ចំរើន បានកត់សម្គាល់ពីការផ្លាស់ប្តូរឥរិយាបថបងប្អូនដែលមកលេងខេត្តព្រះសីហនុនាឱកាសថ្ងៃសម្រាកចូលឆ្នាំចិន លើការទុកដាក់សម្រាមបានយ៉ាងត្រឹមត្រូវ លែងមានការចោលពាសវាលពាសកាលដូចប៉ុន្មានឆ្នាំមុន។
ឃើញទិដ្ឋភាពផ្លាស់ប្តូរយ៉ាងល្អបែបនេះ រហូតដល់ថ្នាក់ដឹកនាំរូបនេះថ្លែងទាំងទឹកចិត្តរំភើបថា ឆ្នាំថ្មីពិតជានាំមកនូវសេរីសួស្ដីល្អគ្រប់ៗគ្នា។
ជាញឹកញយ មហាជនតែងតែឃើញអតីតចៅហ្វាយខេត្តកំពង់ចាមដែលបានផ្លាស់ទៅដឹកនាំខេត្តព្រះសីហនុនេះតែងតែផ្ញើសារវាយប្រហារលើអ្នកចោលសំរាមពាសវាលពាសកាល ឲ្យភ្ញាក់រលឹកចូលរួមថែរក្សាទីក្រុងឆ្នេរមួយនេះ ដែលរដ្ឋាភិបាលបានចាត់ទុកជាខេត្តប៉ូលសេដ្ឋកិច្ចដ៏សំខាន់ និងជាទីក្រុងទំនើបស៊ីវិល័យដែលចាំបាច់ត្រូវថែរក្សាបានទាំងសណ្តាប់ធ្នាប់ និងបរិស្ថានអនាម័យ។
បើតាមរដ្ឋបាលខេត្តព្រះសីហនុ ក្នុងឱកាសបុណ្យចូលឆ្នាំប្រពៃណីចិនរយៈពេល ០៣ ថ្ងៃ ដោយគិតចាប់ពីថ្ងៃទី៣១ ខែមករា ដល់ថ្ងៃទី០២ ខែកុម្ភៈ ឆ្នាំ២០២២ មានភ្ញៀវទេសមកកំសាន្តនៅខេត្តព្រះសីហនុ មានចំនួនសរុប ៩២,៧៦២ នាក់ កើនឡើង ១៣.០៣% បើធៀបនឹងរយៈពេល០៣ថ្ងៃដូចគ្នាក្នុងឆ្នាំ២០២១ កន្លងទៅ។
ការកើនឡើងនៃភ្ញៀវទេសចរនេះដោយសាររដ្ឋបាលខេត្តបានរៀបចំនិងអភិវឌ្ឍដោយកែលម្អសោភ័ណភាពតំបន់ឆ្នេរ មានដូចជា ការរៀបចំក្រាលថ្មក្រានីត ផ្លូវថ្មើរជើង ផ្លូវជិះកង់ ការដាំស្មៅ និងដាំដើមឈើបន្ថែម ភ្លើងបំភ្លឺសាធារណៈ ព្រមទាំងការរៀបចំបន្ទប់ទឹកសាធារណៈ សំដៅប្រែក្លាយក្រុងព្រះសីហនុទៅជាក្រុងទំនើប មានសោភ័ណភាព និងបរិស្ថានល្អ ដែលអាចទាក់ទាញភ្ញៀវទេចរណ៍ និងអ្នកវិនិយោគចូលមកកាន់ខេត្តព្រះសីហនុកាន់តែច្រើនឡើង៕
