សម្ដេចតេជោប្រកាសនៅមុខពលរដ្ឋខេត្តក្រចេះនៅព្រឹកនេះថា គម្រោងស្ពានឆ្លងកាត់ទន្លេក្នុងខេត្តក្រចេះនឹងបើកការដ្ឋានសាងសង់នៅឆ្នាំ២០២៣។
ប្រមុខរដ្ឋាភិបាលបានបញ្ជាក់ថា កុំគិតថាសម្តេចភ្លេចពលរដ្ឋខេត្តក្រចេះ នៅឆ្នាំ២០២៣ ស្ពានថ្មីសន្លាងមួយនឹងសាងសង់ឡើងពីទីរួមខេត្តក្រចេះឆ្លងកាត់ទន្លេមេគង្គ និងផ្លូវតភ្ជាប់ទៅកំពង់ថ្មខេត្តកំពង់ធំ។
សម្តេចតេជោបានបន្ថែមទៀតថា ខេត្តក្រចេះមានផ្លូវតភ្ជាប់ពីក្រចេះទៅស្ទឹងត្រែង និងក៏នឹងមានស្ពាននិងផ្លូវតភ្ជាប់ទៅខេត្តកំពង់ធំ ដែលនឹងសម្រួលការធ្វើដំណើរតភ្ជាប់ផ្ទៃក្នុងប្រទេស។
រដ្ឋាភិបាលចិនបានឯកភាពផ្ដល់ថវិកាកម្ចីមកកម្ពុជា ក្នុងការសាងសង់ស្ពានក្នុងខេត្តក្រចេះ ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ ជាពិសេសជួយជំរុញផ្នែកសេដ្ឋកិច្ច។
តាមការសិក្សារបស់ក្រសួងសាធារណការនិងដឹកជញ្ជូន ស្ពានមួយខ្សែនេះមានប្រវែង ១,៧៦១ម៉ែត្រ ដែលនឹងត្រូវសាងសង់ឡើងក្រោមថវិកាកម្ចីសម្បទានពីសាធារណរដ្ឋប្រជាមានិតចិន ហើយនឹងប្រើប្រាស់រយៈពេលចន្លោះពី ២ ទៅ ៣ ឆ្នាំ ក្នុងការសាងសង់៕
