ក្រសួងសេដ្ឋកិច្ច និងហិរញ្ញវត្ថ ជាថ្មីម្តងទៀត ចេញមកបញ្ជាក់ពីយន្តការដេញថ្លៃនាំចូលជ្រូករស់មកផ្គត់ផ្គង់ក្នុងទីផ្សារកម្ពុជា គឺសម្រាប់ការពារដល់អ្នកចិញ្ចឹមក្នុងស្រុក អ្នកបរិភោគសាច់ជ្រូក និងបង្កើតការប្រកួតប្រជែងដោយតម្លាភាព ព្រមទាំងការផ្គត់ផ្គង់ជ្រូកក្នុងតម្លៃសមរម្យ ប៉ុណ្ណោះ។ ការចេញមកបញ្ជាក់នៅពេលនេះ បន្ទាប់ពីក្រសួងសេដ្ឋកិច្ចច្រានចោលនូវសំណើសុំផ្អាកការរៀបចំនីតិវិធីដេញថ្លៃនាំចូលជ្រូករស់ពីក្រៅប្រទេស របស់ក្រសួងកសិកម្ម រុក្ខាប្រមាញ់និងនេសាទ។
តាមរយៈលិខិតចំនួន ២ទំព័រក្រសួងសេដ្ឋកិច្ច បានអះអាងថា គោលការណ៍ដាក់ដេញថ្លៃដែលត្រូវបានយកមកអនុវត្ត ក្នុងករណីដែលមានកង្វះខាតជ្រូកក្នុងស្រុកតែប៉ុណ្ណោះ។
ដោយឡែក សមាគមអ្នកចិញ្ចឹមសត្វកម្ពុជា ពេលថ្មីៗនេះ ក៏បានធ្វើញត្តិគាំទ្រនូវក្រសួងកសិកម្ម រុក្ខាប្រមាញ់ និងនេសាទ ដែលបានជម្រុញនិងបង្កើនលើវិស័យចិញ្ចឹមសត្វឲ្យមានភាពរីកចម្រើន។ ទន្ទឹមនឹងនេះ សមាគមក៏បានច្រានចោលការដាក់ដេញថ្លៃការនាំចូលជ្រូករស់ពីប្រទេសជិតខាងផងដែរ។
យ៉ាងណា ក្រសួងសេដ្ឋកិច្ច បានបញ្ជាក់បន្ថែមថា ដើម្បីបំពេញតម្រូវការប្រើប្រាស់ក្នុងស្រុកដែលជួបបញ្ហាខ្វះខាតនេះបាន គឺត្រូវផ្អែកទៅលើយន្តការអនុវត្តរបស់ក្រសួងកសិកម្មដូចជា កំណត់កូតានៃបរិមាណនាំចូល កំណត់គុណវុឌ្ឍិនៃក្រុមហ៊ុននាំចូល និងធ្វើការដេញថ្លៃដោយតម្លាភាព។
លើសពីនេះ ក្រសួងសេដ្ឋកិច្ចក៏បានបញ្ជាក់ដែរថា ក្រសួងកំពុងរៀបចំវិធានការជាក់លាក់ពាក់ព័ន្ធនឹងថ្លៃអគ្គីសនី ចំណី ពូជ ជីវសុវត្ថិភាព ដើម្បីកាត់បន្ថយថ្លៃដើមនៃការចិញ្ចឹម និងលុបបំបាត់ការនាំចូលជ្រូករស់ពីក្រៅប្រទេស សំដៅធ្វើយ៉ាងណាឱ្យអ្នកចិញ្ចឹមក្នុងស្រុកមានលទ្ធភាពគ្រប់គ្រាន់សម្រាប់ផ្គត់ផ្គង់លើទីផ្សារ៕
