ប្រមុខរដ្ឋាភិបាលសម្តេចតេជោ ហ៊ុន សែនបានបង្ហើបពីអត្តសញ្ញាណអភិបាលខេត្តក្រចេះគឺជាក្មួយប្រសារសម្តេច។
ថ្លែងក្នុងកម្មវិធីសម្ពោធសមិទ្ធផលស្ពានទាំង ៧ កន្លែង ដែលជាជំនួយរបស់រដ្ឋាភិបាលជប៉ុននៅព្រឹកមិញនេះ សម្តេចតេជោ ហ៊ុន សែន បានថ្លែងថា អភិបាលខេត្តក្រចេះ លោក វ៉ា ថន គឺជាក្មួយប្រសាររបស់សម្តេច។ បើតាមមេដឹកនាំកម្ពុជាបញ្ជាក់ថា ក្រោយតែងតាំងហើយ ទើបដឹងថាជាក្មួយប្រសារ។
លោក វ៉ា ថន បានឡើងកាន់តំណែងជាអភិបាលនៃគណៈអភិបាលខេត្តក្រចេះនៅឆ្នាំ ២០១៨។ មុនឡើងតួនាទីជាអភិបាលខេត្តក្រចេះ លោកបានកាន់មុខតំណែងជាអភិបាលរង ដោយឡើងជំនួសលោក សរ ចំរុង ដែលត្រូវផ្ទេរភារកិច្ចទៅកន្លែងថ្មី។
អតីតអភិបាលខេត្តក្រចេះ សរ ចំរុង បានកាន់តំណែងជាអភិបាលខេត្តក្រចេះអស់រយៈពេលជាង ៥ឆ្នាំពីឆ្នាំ២០១២ នៅគ្រាដែលអតីតអភិបាលខេត្តក្រចេះ លោក ខាំ ភឿន បានស្លាប់ដោយសារគ្រោះថ្នាក់ចរាចរ។
ក្នុងពិធីប្រកាសតែងតាំងអភិបាលខេត្តថ្មី លោក ស ខេង រដ្ឋមន្រ្តីក្រសួងមហាផ្ទៃបានជំរុញឲ្យ លោក វ៉ា ថន ដោះស្រាយបញ្ហាពលរដ្ឋដោយយុត្តិធម៌ ជៀសវាងការទាមទារសេវាកម្រៃខុសច្បាប់ ការធ្វើលិខិតបទដ្ឋាន និងគតិយុត្តិនានា។ លើសពីនេះ ត្រូវបង្ក្រាបបទល្មើស គ្រឿងញៀនដែលបានជះឥទ្ធិពលអាក្រក់ដល់ជនបទ ហាមមិនឲ្យមានការជួលដីតាមព្រំដែនឲ្យបរទេស ត្រូវលុបបំបាត់ការនាំទំនិញចូល និងចេញខុសច្បាប់ និងត្រូវពិនិត្យឬបង់ពន្ធត្រឹមត្រូវ។
លោក ស ខេង បានលើកពីគុណសម្បត្តិអភិបាលខេត្តថ្មីលោកវ៉ា ថន ជាមន្រ្តីដែលបានឆ្លងកាត់បទពិសោធន៍ការងារ និងការសិក្សាបានច្រើន៕
