គណៈកម្មាធិការប្រយុទ្ធប្រឆាំងផលិតផលក្លែងក្លាយ “គ.ប.ផ.ក.” និង សមាគមកម្មសិទ្ធិបញ្ញាកម្ពុជា “ស.ក.ប.ក.” កាលពីដើមសប្តាហ៍នេះបានចុះអនុស្សរណៈនៃការយោគយល់គ្នាបង្កើតជាយន្តការនៃកិច្ចសហប្រតិបត្តិការ ដើម្បីអនុវត្តកិច្ចសហការលើការផ្តល់ការផ្សព្វផ្សាយ អប់រំ និងការផ្តល់ការគាំពារផ្នែកច្បាប់ពាក់ព័ន្ធកម្មសិទ្ធិបញ្ញានៅកម្ពុជា។
លោកស្រី សេង វួចហ៊ុន ប្រធានសមាគមកម្មសិទ្ធិបញ្ញាកម្ពុជា បានបង្ហាញអំពីសារៈសំខាន់នៃកិច្ចសហប្រតិបត្តិការជាមួយ គ.ប.ផ.ក. ដែលជាដៃគូសហការយ៉ាងសំខាន់មួយក្នុងចំណោមដៃគូសហការជាច្រើនរបស់សមាគមកម្មសិទ្ធិបញ្ញាកម្ពុជា ដែលជាស្ថាប័នមានការពាក់ព័ន្ធយ៉ាងជិតស្និទ្ធជាមួយវិស័យកម្មសិទ្ធិបញ្ញានៅកម្ពុជា។
បើតាមលោកស្រី សេង វួចហ៊ុន ដែលកំុពុងកាន់តំណែងជាប្រធានសមាគមកម្មសិទ្ធិបញ្ញាកម្ពុជា បានបញ្ជាក់ថា នៅពេលដែលមានករណីបំពានលើកម្មសិទ្ធិបញ្ញាកើតឡើង គឺ គ.ប.ផ.ក. នេះហើយដែលជាតួអង្គដ៏សំខាន់ក្នុងការអនុវត្តច្បាប់ស្តីអំពីកម្មសិទ្ធិបញ្ញា។ ហេតុនេះ សមាគមកម្មសិទ្ធិបញ្ញាកម្ពុជា និងគណៈកម្មាធិការប្រយុទ្ធប្រឆាំងផលិតផលក្លែងក្លាយ សុទ្ធតែមានភាពចាំបាច់សម្រាប់ការស្វែងយល់បន្ថែមពីគ្នាទៅវិញទៅមក ដើម្បីឱ្យការបំពេញការងាររបស់ខ្លួនកាន់តែមានប្រសិទ្ធភាពខ្ពស់។
លោក មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធាន គ.ប.ផ.ក. បានលើកឡើងពីភាពចាំបាច់ និងសារសំខាន់នៃការបង្កើនកិច្ចសហប្រតិបត្តិការជាមួយសមាគមកម្មសិទ្ធិបញ្ញាកម្ពុជា លើគោលបំណងសំខាន់ផ្តោតទៅលើការអប់រំ ការផ្សព្វផ្សាយ និងការផ្តល់ការគាំពារផ្នែកច្បាប់ពាក់ព័ន្ធកម្មសិទ្ធិបញ្ញានៅកម្ពុជារវាងគណៈកម្មាធិការ និងសមាគម។
លោកបានឲ្យដឹងថា តាមរយៈការបណ្តុះបណ្តាល ការចែករំលែកបទពិសោធន៍ និងការផ្សព្វផ្សាយដល់ដៃគូវិស័យឯកជននេះ នឹងអាចបង្កើនការយល់ដឹងអំពីច្បាប់កម្មសិទ្ធិបញ្ញា ជាពិសេសការប្រយុទ្ធប្រឆាំងផលិតផលក្លែងក្លាយ ដែលរំលោភលើកម្មសិទ្ធិបញ្ញានៅកម្ពុជា។
កន្លងទៅនេះគណៈកម្មាធិការប្រយុទ្ធប្រឆាំងផលិតផលក្លែងក្លាយ បានធ្វើការបង្ក្រាបនិងបានធ្វើការបំផ្លាញចោលជាងមួយពាន់តោនផលិតផលប្រើប្រាស់ និងគ្រឿងឧបភោគ-បរិភោគខុសច្បាប់ និងខូចគុណភាព ក៏ដូចជាផលិតផលប្រើប្រាស់ទូទៅជាច្រើនសន្ធឹកសន្ធាប់ ព្រមទាំងបានឃាត់ខ្លួនជនសង្ស័យ បញ្ជូនទៅតុលាការដើម្បីផ្តន្ទាទោសតាមច្បាប់ជាច្រើននាក់ផងដែរ។
លោក មៀច សុផាន់ណា បានថ្លែងសង្កត់ថា បញ្ហាផលិតផលក្លែងក្លាយ ការរំលោភកម្មសិទ្ធិបញ្ញា និងចំណីអាហារខូចគុណភាព ដែលមានផ្ទុកសាធាតុគីមីដូចជាគ្រឿងឧបភោគ-បរិភោគ គឺបណ្តាលឱ្យប៉ះពាល់ធ្ងន់ធ្ងរដល់សុខភាព អាយុជីវិត និងសេដ្ឋកិច្ចសង្គមកម្ពុជា៕
