កម្ពុជាកំពុងស្វាគមន៍គម្រោងអភិវឌ្ឍន៍នានាជាច្រើនតាមរយៈក្រុមអ្នកវិនិយោគបរទេស ក្នុងនោះប្រទេសចិនដែលជាមហាយក្សពិភពលោកមួយផងដែរ ក៏បានចូលរួមចំណែកយ៉ាងសំខាន់ជំរុញកំណើនសេដ្ឋកិច្ចកម្ពុជាដោយឈរចំណាត់ថ្នាក់លេខ ១។
តាមរយៈសន្ទុះនេះ ចិន នៅតែជាអ្នកវិនិយោគច្រើនបំផុតសម្រាប់ប្រទេសកម្ពុជា ដែលមានចំនួន ៥៣,៤ ភាគរយ នៃការវិនិយោគសរុបចំនួន ៤,៣៥ ពាន់លានដុល្លារ ដែលកម្ពុជាបានអនុម័តកាលពីឆ្នាំមុន។
ការវិនិយោគទ្រព្យសកម្មថេរពីប្រទេសចិន មានចំនួន ២,៣២ ពាន់លានដុល្លារ កាលពីឆ្នាំមុន កើនឡើង ៦៧ភាគរយ។
សូមបញ្ជាក់ថា ក្នុងឆ្នាំ២០២១កន្លងទៅ ក្រុមបឹ្រក្សាអភិវឌ្ឍន៍កម្ពុជា បានអនុម័តគម្រោងវិនិយោគសរុបចំនួន១៦១គម្រោង ដោយគិតជាទំហំទឹកប្រាក់ប្រមាណជិត៤ពាន់លានដុល្លារអាមេរិក។ គម្រោងវិនិយោគនេះ គឺមានការធ្លាក់ចុះជិតពាក់កណ្តាល បើធៀបទៅនឹងឆ្នាំ២០២០កន្លងទៅ ដោយសារតែការផ្ទុះរីករាលដាលនៃជំងឺកូវីដ១៩។
ក្នុងចំណោមគម្រោងចំនួន១៦១ដែលត្រូវបានCDCអនុម័តរួចនោះ គឺការវិនិយោគនៅក្រៅតំបន់សេដ្ឋកិច្ចពិសេសមានចំនួន១២៥គម្រោង សរុបទុនវិនិយោគចំនួន១.៩៧ពាន់លានដុល្លារ និងនៅក្នុងតំបន់សេដ្ឋកិច្ចពិសេស មានចំនួន៣៦គម្រោង សរុបទុនវិនិយោគជាង១.៩៨ពាន់លានដុល្លារ។ ក្នុងនោះ គម្រោងវិនិយោគលើផ្នែកកសិកម្ម និងកសិឧស្សាហកម្មមានចំនួន១៤គម្រោង, គម្រោងវិនិយោគលើផ្នែកឧស្សាហកម្មមានចំនួន១៣៥គម្រោង, គម្រោងវិនិយោគលើផ្នែកទេសចរណ៍មានចំនួន២គម្រោង និងហេដ្ឋារចនាសម្ព័ន្ធ និងផ្សេងៗទៀតមានចំនួន១០គម្រោង។
បើតាមក្រុមប្រឹក្សាអភិវឌ្ឍន៍កម្ពុជា នៅឆ្នាំ ២០២០កន្លងទៅ គណៈកម្មាធិការវិនិយោគកម្ពុជា និងគណៈកម្មាធិការតំបន់សេដ្ឋកិច្ចពិសេសកម្ពុជាបានបញ្ជាក់ថា គម្រោងវិនិយោគចំនួន ២៣៨គម្រោងនេះ គឺថយចុះប្រមាណ ១២% ធៀប ឆ្នាំ២០១៩ផងដែរ៕
