កាលពីថ្មីៗនេះ រដ្ឋមន្ត្រីនៃក្រសួងការពាររបស់ចក្រភពអង់គ្លេសបានបង្ហើបឲ្យដឹងថា កងទ័ពរបស់រុស្ស៊ីជាច្រើននាក់កំពុងឈរជើងនៅទីតាំងមួយដែលមានរយៈចំងាយត្រឹម ២៥ គីឡូម៉ែត្រប៉ុណ្ណោះពីរដ្ឋធានីនៃប្រទេសអ៊ុយក្រែនគឺទីក្រុង Kyiv។
“ការវាយប្រហារនៅភាគពាយ័ព្យនៃទីក្រុង Kyiv គឺកំពុងបន្ត ខណៈកងទ័ពរបស់រុស្ស៊ីជាច្រើនត្រូវបានប្រទះឃើញកំពុងឈរជើងនៅត្រឹម ២៥ គីឡូម៉ែត្រប៉ុណ្ណោះពីកណ្ដាលទីក្រុង”។ នេះបើតាមសម្ដីរបស់រដ្ឋមន្ត្រីអង់គ្លេសបាននិយាយ។
“ដោយឡែកកងកម្លាំងរុស្ស៊ីជាច្រើននៅភាគខាងជើងនៃទីក្រុង Kyiv គឺបានបែកខ្ញែក ដែលនេះទំនងជាយុទ្ធសាស្ត្រថ្មីសម្រាប់ការឡោមព័ទ្ធទីក្រុងមួយនេះ។ វាក៏អាចជាការបន្ធូរបន្ថយការខាតបង់របស់រុស្ស៊ីបានខ្លះ ដោយសារការវាយបករបស់អ៊ុយក្រែនមួយរយៈកាលចុងក្រោយគឺប៉ះពាល់ខ្លាំងដល់ស្ថានភាពទ័ពរុស្ស៊ី”។
ទន្ទឹមនឹងនោះ ក្រុមការងាររបស់ CNN ដែលកំពុងប្រចាំការនៅទីក្រុង Kyiv បានរាយការណ៍មកថា កាលពីព្រឹកថ្ងៃសៅរ៍គឺមានករណីផ្ទុះអាវុធមួយបានកើតឡើង ប៉ុន្តែមិនច្បាស់ថាជាការបង្កឡើងដោយកងទ័ពរុស្ស៊ី ឬអ៊ុយក្រែនឡើយ។
បញ្ជាក់ដែរថា ក្រៅពី Kyiv ទីក្រុងសំខាន់ៗដូចជា Kharkiv, Chernihiv, Sumy និង Maiupol គឺនៅតែបន្តស្ថិតក្រោមការឡោមព័ទ្ធពីសំណាក់កងទ័ពរុស្ស៊ីនៅឡើយ។ នេះបើតាមការឲ្យដឹងពីរដ្ឋមន្ត្រីខាងលើ៕
ប្រភព: CNN
