សម្តេចតេជោ ហ៊ុន សែន នាយករដ្ឋមន្រ្តី បានចេញបញ្ជាឲ្យដាំកូនឈើឡើងវិញ នៅក្នុងផ្ទៃដីជាង៦ម៉ឺនហិកតា ដែលបានរឹបអូសពីប្រជាពលរដ្ឋ និងឈ្មួញទុច្ចរិត កាន់កាប់ទន្ទ្រាន នៅជុំវិញបឹងទន្លេសាបនាពេលកន្លងមក។ នេះបើតាមប្រសាសន៍សម្តេចថ្លែងក្នុងពិធីបិទសន្និបាតបូកសរុបការងារក្រសួងកសិកម្ម រុក្ខាប្រមាញ់និងនេសាទ ប្រចាំឆ្នាំ២០២១ និងទិសដៅអនុវត្តឆ្នាំ២០២២ កាលពីថ្ងៃទី២៣ ខែមីនា ឆ្នាំ២០២២។
សម្តេច ហ៊ុន សែន បានចេញបញ្ជាទៅកាន់ ខេត្តជាប់បឹងទន្លេសាបទាំងអស់ ឱ្យដាំកូនឈើឡើងវិញ នៅក្នុងដីជាង៦ម៉ឺនហិកតា ដែលបានរឹបអូសពីប្រជាពលរដ្ឋ និងឈ្មួញទុច្ចរិត កាន់កាប់ទន្ទ្រាន នៅជុំវិញបឹងទន្លេសាបនាពេលកន្លងមក។
ដោយសម្តេចបន្តដូច្នេះថា «ខ្ញុំសូមបញ្ជាក់ឡើងវិញ ត្រូវដាំកូនឈើឡើងវិញ គ្រប់ទីកន្លែង ដីដែលយើងមានជាង ៦ ម៉ឺនហិកតា ធ្វើយ៉ាងណាឱ្យក្លាយ ទៅជាព្រៃលិចទឹក ហើយប៉ុន្មានឆ្នាំក្រោយ ឱ្យមានភាពសម្បូរឡើងវិញ នូវធនធានត្រីរបស់យើង»។
គួរបញ្ជាក់ថា ការចេញបញ្ជាឲ្យដាំកូនឈើឡើងវិញ នៅក្នុងដីជាង៦ម៉ឺនហិកតានេះ គឺធ្វើឡើងបន្ទាប់ពីសម្តេចមើលឃើញថា ការបង្ក្រាបបទល្មើសនេសាទក្នុងបឹងទន្លេសាបនាពេលកន្លងមក មិនមានប្រសិទ្ធភាព និងមានការឃុតឃិត គ្នារវាងមន្ត្រី និងឈ្នួញ និងបានធ្វើឲ្យធនធានព្រៃលិចទឹក និងធនធានត្រីក្នុងបឹងទន្លេសាបបានថយចុះពីមួយឆ្នាំទៅមួយឆ្នាំ៕
អត្ថបទ៖រង្សី
