បើតាមរដ្ឋមន្រ្តីក្រសួងពាណិជ្ជកម្មកម្ពុជាបានបញ្ជាំក់ឲ្យដឹងថា ទំហំពាណិជ្ជរវាងកម្ពុជានិងប្រទេសហ្គាបុងមានការកើនឡើងក្នុងរយៈកាល ៤ ឆ្នាំចុងក្រោយនេះ។
ក្នុងជំនួបជាមួយរដ្ឋមន្រ្តីក្រសួងពាណិជ្ជកម្មរបស់ប្រទេសហ្គាបុង លោកប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មបានបញ្ជាក់ថា ទំហំពាណិជ្ជកម្មកម្ពុជា-ហ្គាបុង សម្រេចបានប្រមាណ១៤៩លានដុល្លារអាម៉េរិកក្នុងរយៈពេល០៤ឆ្នាំគិតពីឆ្នាំ២០១៨ ដល់ឆ្នាំ២០២១។ ដោយឡែកទំនាក់ទំនងពាណិជ្ជកម្មទ្វេភាគីរវាងកម្ពុជានិងហ្គាបុងក្នុងឆ្នាំ២០២១ មានទំហំប្រហែល ៤៥លានដុល្លារធៀបនឹង ៤៣លានដុល្លារក្នុងឆ្នាំ២០២០។
បើតាមលោករដ្ឋមន្រ្តី ហ្គាបុង ជាទីផ្សារដ៏សំខាន់សម្រាប់ការនាំចេញអង្ករកម្ពុជា។
លោក Yves Fernand Manfoumbi រដ្ឋមន្រ្តីក្រសួងពាណិជ្ជកម្មប្រទេសហ្គាបុងបានបញ្ជាក់ថា ប្រទេសហ្គាបុងកំពុងស្វែងរកប្រទេសដៃគូពាណិជ្ជកម្មបន្ថែមនៅតំបន់អាស៊ី ជាពិសេសនៅកម្ពុជា។
លោករដ្ឋមន្រ្តីប្រទេសហ្គាបុងក៏បានស្នើពង្រីកកិច្ចសហប្រតិបត្តិការលើវិស័យដែលផ្តល់ប្រយោជន៍ទៅវិញទៅមករវាងប្រទេសទាំងពីរដូចជា (១) ការបង្កើត MoU ស្តីពីកិច្ចសហប្រតិបត្តិការពាណិជ្ជកម្ម កម្ពុជា-ហ្គាបុង ដើម្បីសម្រួលដល់កិច្ចសហប្រតិបត្តិការសេដ្ឋកិច្ចនិងពាណិជ្ជកម្មក្នុងការអនុវត្តក្របខណ្ឌគម្រោងនានា (២)ជំរុញការវិនិយោគផ្នែកឧស្សាហកម្ម និង(៣)ការដោះដូរពាណិជ្ជកម្មទ្វេភាគី ដែលមានលក្ខណៈបំពេញបន្ថែម និងការរៀបចំពិព័រណ៍ពាណិជ្ជកម្មជាដើម។
លោកបា៉ន សូរស័ក្តិ ក៏បានគាំទ្រឱ្យមានការបង្កើតMoU ស្តីពីកិច្ចសហប្រតិបត្តិការពាណិជ្ជកម្មរវាងកម្ពុជា-ហ្គាបុង ដែលរំពឹងថា ភាគីទាំងពីរនឹងពន្លឿននីតិវិធី និងពិនិត្យបញ្ចប់សេចក្តីព្រាងMoUនេះឱ្យបានឆាប់រហ័ស ដើម្បីអាចធ្វើការចុះហត្ថលេខាបាន នៅអំឡុងឆមាសទី២ ឆ្នាំ២០២២នេះ។
បើតាមរបាយការណ៍បស់ក្រសួងពាណិជ្ជកម្មបានបង្ហាញតួលេខ ៤ ឆ្នាំចុងក្រោយនៃការធ្វើពាណិជ្ជកម្មរវាងប្រទេសកម្ពុជានិងហ្គាបុង ដោយក្នុងឆ្នាំ២០១៨ (នាំចេញ ២៩,៣៥លានដុល្លារ, នាំចូល N/A), ឆ្នាំ២០១៩ (នាំចេញ ៣១,០៨លានដុល្លារ, នាំចូល ០,០៣លានដុល្លារ), ឆ្នាំ២០២០ (នាំចេញ ៤៣,៣៥លានដុល្លារ, នាំចូល N/A) និង ឆ្នាំ២០២១ (នាំចេញ៤៤,៧៥លានដុល្លារ, នាំចូល ០,០២លានដុល្លារ) និងទំហំពាណិជ្ជកម្មទ្វេភាគីប្រហែល ៤៥លានដុល្លារក្នុងឆ្នាំ២០២១ ធៀបនឹង ៤៣លានដុល្លារក្នុងឆ្នាំ២០២០៕
