រដ្ឋាភិបាលដាក់ខេត្តចំនួន ៤ លែងតម្រូវឱ្យពាក់ម៉ាស

កម្ពុជា សម្រេចដាក់ខេត្តចំនួន៤ គឺខេត្តរតនគិរី មណ្ឌលគិរី ស្ទឹងត្រែង និងព្រះវិហារ មិនតម្រូវឱ្យពាក់ម៉ាសទៀតនោះទេ។ ទោះបីជាយ៉ាងណា ក៏រាជរដ្ឋាភិបាល ទុកឱ្យប្រជាពលរដ្ឋសម្រេចចិត្តខ្លួនឯងក្នុងការពាក់ ឬមិនពាក់។ នេះបើតាមសម្តេចតេជោ ហ៊ុន សែន នាយករដ្ឋមន្ត្រីកម្ពុជា តាមរយៈសារជាសំឡេងនៅល្ងាចថ្ងៃអាទិត្យ ទី១០ ខែមេសា ឆ្នាំ២០២២នេះ។

សម្តេចតេជោ ហ៊ុន សែន ថ្លែងថា៖ «ខ្ញុំសូមបញ្ជាក់ថា ការលើកលែងកាតព្វកិច្ចពាក់ម៉ាស សម្រាប់ខេត្តទាំង ៤ នេះ គឺមិនមែនយកអាយុជីវិតប្រជាពលរដ្ឋមកសាកល្បងនោះទេ នេះជាការសាកល្បងនូវភាពស៊ាំ និងភាពធន់ក្នុងសហគមន៍ បន្ទាប់ពីយើងបានចាក់វ៉ាក់សាំងគ្របដណ្តប់ពេញផ្ទៃប្រទេស»។