មូលនិធិរូបិយប័ណ្ណអន្តរជាតិ ហៅកាត់ IMF នឹងពិចារណាក្នុងការផ្ដល់ជំនួយផ្នែកហិរញ្ញវត្ថុរហ័សទោកាន់ប្រទេសដែលកំពុងជាប់បំណុលវ័ណ្ឌកស្រីលង្កា ក្រោយមានការសម្របសម្រួលពីអ្នកតំណាងឥណ្ឌា។ នេះបើតាមការលើកឡើងពីរដ្ឋមន្ត្រីហិរញ្ញវត្ថុស្រីលង្កាបាននិយាយកាលពីថ្ងៃអង្គារ។
គណៈប្រតិភូដឹកនាំដោយរដ្ឋមន្ត្រីហិរញ្ញវត្ថុរបស់ប្រទេសស្រីលង្កា Ali Sabry បានចាប់ផ្តើមកិច្ចពិភាក្សាផ្លូវការជាមួយ IMF ក្នុងទីក្រុងវ៉ាស៊ីនតោនកាលពីថ្ងៃចន្ទសម្រាប់កម្មវិធីដែលរដ្ឋាភិបាលសង្ឃឹមថានឹងជួយបង្កើនប្រាក់បន្ថែមនៅទុនបម្រុងជាតិ ក៏ដូចជាអូសទាញហិរញ្ញវត្ថុផ្សេងៗក្នុងការចំណាយលើការនាំចូលប្រេង ស្បៀងអាហារ និងថ្នាំសង្កូវជាដើម។
ដោយឡែកលោក Shamir Zavahir ដែលជាជំនួយការលោក Sabry បានឲ្យដឹងតាមរយៈការបង្ហោះសារលើ Twitter ថា ស្រីលង្កាបានសុំខ្ចីប្រាក់ពី IMF ក្រោមលក្ខខណ្ឌវិបត្តិហិរញ្ញវត្ថុបន្ទាន់ (RFI) ដែលវាមានន័យថា ប្រទេសមួយកំពុងត្រូវការសមតុល្យនៃការទូទាត់ជាបន្ទាន់ ប៉ុន្តែ ដំបូងឡើយIMF ហាក់មិនផ្ដល់សញ្ញាវិជ្ជមានឡើយសម្រាប់សំណើមួយនេះ។
” IMF បានផ្ដល់ដំណឹងមកកាន់រដ្ឋមន្ត្រី Sabry ថា ឥណ្ឌាបានចេញមុខតំណាងជំនួសស្រីលង្កាក្នុងការស្នើសុំជំនួយ RFI។ បច្ចុប្បន្ន IMF កំពុងនឹងពិចារណាសំណើពិសេសមួយនេះ បើទោះជាវាហាក់ដូចជាមិនស្ថិតទៅតាមលក្ខខណ្ឌស្តង់ដាររបស់ RFI ក៏ដោយ”។
បញ្ជាក់ដែរថា វិបត្តិសេដ្ឋកិច្ចនៅប្រទេសស្រីលង្កាពីមួយថ្ងៃទៅមួយថ្ងៃកាន់តែមានភាពវឹកវរទៅៗ ខណៈប្រេង អគ្គិសនី ស្បៀងអាហារ និងថ្នាំសង្កូវផ្សេងៗក៏កំពុងមានតិចតួចជាច្រើនសប្ដាហ៍មកហើយ៕
ប្រភព: RT
