ស្រុកបន្ទាយស្រីនៃខេត្តសៀមរាប ក្រៅពីជាតំបន់ទេសចរណ៍សំបូរសំណង់ប្រាសាទអាយុរាប់ពាន់ឆ្នាំ ស្រុកដែលមានចម្ងាយជាង ២០គីឡូម៉ែត្រពីក្រុងសៀមរាបនេះ ក៏មានសហគ្រាសផលិតទឹកសុទ្ធធំៗចំនួនពីរកន្លែង ដែលកំពុងធ្វើអាជីវកម្មផលិតទឹកសុទ្ធពីរ៉ែធម្មជាតិ មានការទទួលស្គាល់លើទីផ្សារ ហើយមានការចែកចាយទូទាំងប្រទេស។
សហគ្រាសផលិតទឹកបរិសុទ្ធទាំង ២នោះរួមមាន៖
១/ ក្រុមហ៊ុនផលិតទឹករ៉ែធម្មជាតិ អ៊ីលែន
ក្រុមហ៊ុនផលិតទឹកសុទ្ធនេះមានទីតាំងស្ថិតនៅជើងភ្នំគូលែន ក្នុងស្រុកបន្ទាយស្រីខេត្តសៀមរាប។ ក្រោយចំណាយពេលសិក្សារាប់សិបឆ្នាំ ក្រុមហ៊ុនផលិតទឹកសុទ្ធអ៊ីលែន បានរកឃើញប្រភពទឹកដែលមានកម្រិត Ph រហូតដល់ ៨.២ ពីភ្នំគូលេន ដើម្បីផលិតទឹកសុទ្ធដែលមានគុណភាពខ្ពស់ចែកចាយនៅលើទីផ្សារ។
ទឹកបរិសុទ្ធអ៊ីលែន ក៏មានផ្ទុកសារធាតុកាល់ស្យូម, ភ្លុយអរ, ប៉ូតាស្យូម និងម៉ាញ៉េស្យូម ដែលធ្វើឲ្យអ្នកពិសាទទួលបានសុខភាពល្អ ការអភិវឌ្ឍន៍ឆ្អឹង ធ្មេញរឹងមាំ និងជួយសម្រួលដល់សម្ពាធឈាមឲ្យដើរបានស្រួលផងដែរ។
២/សហគ្រាស អូគូលែន
សហគ្រាសផលិតទឹកសុទ្ធ អូគូលែន ដែលមានទីតាំងនៅស្រុកបន្ទាយស្រីដែរនោះ ក៏កំពុងសាងស្លាកយីហោយ៉ាងល្បីល្បាយក្លាយជាម៉ាកពេញនិយមបំផុតនៅក្នុងស្រុក ជាពិសេសស្រទាប់ពលរដ្ឋមានជីវភាពកម្រិតខ្ពស់។
ទឹកបរិសុទ្ធអូគូឡែន មានគុណភាពមិនចាញ់ទឹកបរិសុទ្ធនាំចូលម៉ាកថ្លៃៗនោះទេ។ អូគូលែន ផលិតឡើងពីទឹករ៉ែធម្មជាតិសុទ្ធសាធ ដែលបានយកចេញពីក្រោមថ្មយ៉ាងជ្រៅ ជម្រៅយ៉ាងហោចណាស់៨០ម៉ែត្រនៃជើងភ្នំគូលែន។
ទឹកបរិសុទ្ធអូគូលែនក៏ជាផលិតផល ជាទីមោទនភាពមួយរបស់ស្រុកបន្ទាយស្រី ដែលត្រូវបានផលិតឡើងដោយក្រុមហ៊ុន Kulara Water មានទីតាំងផលិតនៅភូមិត្បែងកើត ឃុំត្បែង ស្រុកបន្ទាយស្រី ខេត្តសៀមរាប៕
