កាលពីពេលថ្មីៗនេះ ប្រធានាធិបតីសហរដ្ឋអាមេរិកចូ បៃដិនបានស្នើទៅកាន់ព្រឹទ្ធសភាសម្រាប់ការបញ្ចេញកញ្ចប់ជំនួយដល់ប្រទេសអ៊ុយក្រែន ប្រមាណ ៣៣ ពាន់លានដុល្លារ ដើម្បីទប់ទល់ការវាយប្រហារពីសំណាក់មហាអំណាចរុស្ស៊ី។
ប្រាប់ទៅកាន់សារព័ត៌មាននៅសេតវិមានកាលពីថ្ងៃព្រហស្បតិ៍ ប្រធានាធិបតីរូបនេះនិយាយថា ជំនួយទៅកាន់ប្រទេសអ៊ុយក្រែន គឺជាតម្លៃស្ដួចស្ដើងណាស់ ក្នុងការផ្ដួលរំលំរុស្ស៊ី និងបញ្ចៀសសង្គ្រាមនៅថ្ងៃអនាគត។
“សង្គ្រាមមួយនេះពិតជាខ្ជះខ្ជាយថវិកាខ្លាំងណាស់ តែបើសិនជាយើងមិនចំណាយពេលនេះ វានឹងកាន់តែយ៉ាប់យ៉ឺននៅពេលក្រោយ។ ពួកយើងមានជម្រើសតែ ២ ប៉ុណ្ណោះ គាំទ្រប្រជាជនអ៊ុយក្រែនក្នុងការការពារទឹកដីពួកគេ ឬគាំទ្ររុស្ស៊ីឲ្យបន្តនៅអំពើឃោ.រឃៅ និងការឈ្លានពានលើអ៊ុយក្រែន”។
បើទោះជាបៃដិន មិនបានបញ្ជាក់ពីចំនួនច្បាស់លាស់ក្នុងការស្នើសុំនោះ ប៉ុន្តែមន្ត្រីរដ្ឋបាលជាន់ខ្ពស់មួយរូបបានបង្ហើបថា សេតវិមានបានស្នើសុំថវិកា ៣៣ ពាន់លានដុល្លារក្នុងការជួយដល់អ៊ុយក្រែន។
បញ្ជាក់ដែរថា កាលពីខែមុន ព្រឹទ្ធសភាអាមេរិកបានអនុម័តបញ្ចេញកញ្ចប់ជំនួយ ១៣,៦ ពាន់លានដុល្លារទៅកាន់ទីក្រុង Kyiv ប៉ុន្តែរដ្ឋបាលបៃដិនបាននិយាយថា ពួកគេបានប្រើប្រាស់ថវិកាអស់ច្រើនមកហើយ ហើយសម្រាប់រយៈពេលប៉ុន្មានសប្ដាហ៍មកនេះ ពួកគេបានជួយជាកញ្ចប់ជំនួយយោធា និងរដ្ឋបាលទៅកាន់ប្រទេសអ៊ុយក្រែនជំនួសវិញ៕
ប្រភព: aljazeera
