លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានទទួលជួបលោក SANJAY C. KiRLOSKAR នាយក និងអ្នកគ្រប់គ្រងទូទៅក្រុមហ៊ុន A Kirloskar Group Company របស់ឥណ្ឌានិងសហការី នៅទីស្តីការក្រសួងកសិកម្ម រុក្ខាប្រមាញ់ និងនេសាទ ថ្ងៃទី១៨ ខែឧសភា ឆ្នាំ២០២២។
ជំនួបរវាងរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំក្រុមហ៊ុន A Kirloskar Group Company គឺក្នុងគោលបំណង ដើម្បីស្នើសុំការណែនាំលើកម្មវត្ថុនៃការធ្វើទំនើបកម្មកសិកម្ម សម្រាប់ដំណាំកសិឧស្សាហកម្ម ឈើហូបផ្លែ បន្លែ និងការចិញ្ចឹមសត្វ ដោយប្រើប្រាស់បច្ចេកវិទ្យាទំនើបចុងក្រោយរបស់ឥណ្ឌា។
បន្ទាប់ពីបានស្តាប់ដោយសង្ខេបអំពីគោលបំណងរបស់ក្រុមហ៊ុនរួចមក លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានសម្តែងនូវការស្វាគមន៍ និងគាំទ្រលើគោលបំណងរបស់ក្រុមហ៊ុន ដោយបានបញ្ចេញទស្សន:ចំបងពីរសំខាន់នោះគឺ ៖ ១- អាចជួយកាត់បន្ថយថ្លៃដើមផលិត ដែលត្រូវចំណាយរបស់កសិករ និង២- មានលក្ខណ:ងាយស្រួលប្រើ សមស្របទៅតាមបរិបទនៃការវិវឌ្ឍន៍រីកចម្រើនផ្នែកបច្ចេកវិទ្យាកសិកម្ម (Modern agriculture technology) និងភាតរបរិស្ថាន។
លោករដ្ឋមន្ត្រី បានបញ្ជាក់ថា ដោយសារកំណើនប្រជាជន សេចក្តីត្រូវការស្បៀងទាំងបរិមាណ និងគុណភាពកាន់តែកើនឡើងជាបន្តបន្ទាប់ស្របទៅតាមការវិវឌ្ឍន៍រីកចម្រើនទាំងសេដ្ឋកិច្ច និងសង្គម ហើយនេះគឺជាហេតុផលដែលក្រសួងកសិកម្ម រុក្ខាប្រមាញ់ និងនេសាទ បាននិងកំពុងជំរុញ គាំទ្រ និងលើកទឹកចិត្តឲ្យប្រជាកសិករ និងវិស័យឯកជនប្រើប្រាស់បច្ចេកវិទ្យាកសិកម្មទំនើប ។
សម្រាប់គម្រោងនេះ លោករដ្ឋមន្ត្រី មានក្តីសង្ឃឹមថា នឹងចូលរួមចំណែកធ្វើឲ្យគោលនយោបាយអភិវឌ្ឍន៍វិស័យកសិកម្ម ២០២២ -២០៣០ របស់រាជរដ្ឋាភិបាល ក៏ដូចជារបស់ក្រសួងកសិកម្ម រុក្ខាប្រមាញ់ និងនេសាទ អាចឈានទៅដល់គោលដៅតាមផែនការដែលបានគ្រោងទុកគឺប្រែក្លាយប្រទេសកម្ពុជាទៅជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០។
កិច្ចការស៊ីជម្រៅទាក់ទងបច្ចេកទេស និងការអនុវត្តជាក់ស្តែង លោករដ្ឋមន្ត្រីបានណែនាំឲ្យក្រុមហ៊ុនបន្តធ្វើកិច្ចការនេះជាមួយអគ្គនាយកដ្ឋានកសិកម្ម ដោយឡែកក្រសួងនឹងរង់ចាំផ្តល់កិច្ចសហការបន្ថែមតាមការចាំបាច់ ដើម្បីឲ្យគម្រោងនេះដំណើរការទៅដោយរលូន និងទទួលបានជោគជ័យ។
ជាមួយគ្នានេះ លោកនាយកក្រុមហ៊ុន បានបង្ហាញពីឆន្ទ:ថា ក្រុមការងារបច្ចេកទេសនឹងខិតខំធ្វើឲ្យគ្រោងនេះ បានដំណើរការក្នុងពេលឆាប់ៗខាងមុខ ឆ្លើយតបសេចក្តីត្រួវការរបស់កសិករបានទាន់ពេល ហើយសង្ឃឹមថា កសិករនឹងទទួលបានប្រយោជន៍យ៉ាងច្រើនពីបច្ចេកវិទ្យាទំនើបមួយនេះ ៕
