បច្ចុប្បន្នវិស័យដឹកជញ្ជូន និងបញ្ញើ នៅប្រទេសកម្ពុជា មានការរីកចម្រើនយ៉ាងខ្លាំង ជាពិសេសស្ថិតក្នុងបរិបទនៃការរីកចម្រើនរបស់ប្រទេសជាតិ និងការរីកចម្រើនផ្នែកសេដ្ឋកិច្ច។ ទោះជារយៈពេលពីរបីឆ្នាំមកនេះ មានការរំខានដោយសារវិបត្តិកូវីដ-១៩យ៉ាងណាក្តី ប៉ុន្តែវិស័យដឹកជញ្ជូន នៅតែសំខាន់ មិនអាចខ្វះបាន ទាំងសេវាដឹកអ្នកដំណើរ និងសេវាកម្មបញ្ញើឥវ៉ាន់នានា។
ទោះបីជាបែបនេះវិស័យខាងលើនេះ មានវិនិយោគិនជាម្ចាស់ក្រុមហ៊ុនជាច្រើន កំពុងដំណើរការនៅពាសពេញប្រទេសកម្ពុជា ហើយក្នុងនោះ ក៏មានក្រុមហ៊ុនមួយចំនួន មានម្ចាស់ជាឧកញ៉ាផងដែរ។
ចង់ដឹងថា តើឧកញ៉ារូបណាខ្លះ ដែលរកស៊ីក្នុងវិស័យដឹកជញ្ជូន និងបញ្ញើ សូមតាមដានជាមួយឧកញ៉ាញូស៍ដូចតទៅ៖
១. ឧកញ៉ា សួរ វីរៈ ៖ ម្ចាស់ក្រុមហ៊ុន វីរៈប៊ុនថាំ អេចប្រេស
លោកឧកញ៉ា សួរ វីរៈ គឺជាអគ្គនាយកក្រុមហ៊ុន វីរៈប៊ុនថាំ អេចប្រេស ដែលជាក្រុមហ៊ុនដឹកជញ្ជូនអ្នកដំណើរ និងបញ្ញើឥវ៉ាន់ឈានមុខគេមួយ នៅក្នុងប្រទេសកម្ពុជា។
ឧកញ៉ា សួរ វីរៈ ដែលមានស្រុកកំណើតនៅខេត្តកំពង់ធំ ។ លោក បានចាប់ផ្តើមអាជីពមួយនេះ តាំងពីឆ្នាំ២០០៤ ដែលពេលនោះ លោកទិញត្រឹមឡានតូរីសមួយគ្រឿង សម្រាប់ដឹកអ្នកដំណើរពីកោះកុង ទៅខេត្តព្រះសីហនុ លើផ្លូវគ្រួសក្រហម។ ប៉ុន្តែពេលនេះ ក្រុមហ៊ុនរបស់លោក មានរថយន្តទំនើបៗជាង ៦០០គ្រឿង សម្រាប់ដឹកអ្នកដំណើរ និងបញ្ញើអ៊ីវ៉ាន់នៅទូទាំង ២៥រាជធានី-ខេត្ត ក្រុង។
២. អ្នកឧកញ៉ា សៀ ឫទ្ធី ៖ អគ្គនាយកក្រុមហ៊ុន Worlds Bridge Group
អ្នកឧកញ៉ា សៀ ឫទ្ធី គឺជាវិនិយោគិន និងជាអ្នកអភិវឌ្ឍន៍អចលនទ្រព្យដ៏ល្បីល្បាញមួយរូបប្រចាំប្រទេសកម្ពុជា មិនតែប៉ុណ្ណោះលោកក៏ជាបុគ្គលឆ្នើមមួយរូបក្នុងចំណោមមហាសេដ្ឋីលំដាប់កំពូលល្បីៗជាច្រើនរបស់ប្រទេសកម្ពុជា ដែលបច្ចុប្បន្នលោកកាន់កាប់មុខជំនួញជាង ៣០ក្រុម ហើយក្នុងនោះក៏មានមុខជំនួញក្នុងវិស័យដឹកជញ្ជូនផងដែរគឺ ក្រុមហ៊ុន Kerry Express (សេវាកម្មដឹកជញ្ជូនបញ្ញើរហ័ស)។
៣. ឧកញ៉ា ស្រី ចាន់ថន អគ្គនាយក្រុមហ៊ុន Jet’s Express
ក្រុមហ៊ុន jet’s Express cambodia ត្រូវបានផ្ដួចផ្ដើមគំនិតនាដើមឆ្នាំ ២០២១ ក្នុងអំឡុងពេលដែលប្រទេសជាតិកំពុងជួបវិបត្តិកូវីដ-១៩ ដោយមានការគាំទ្រពីបុគ្គលិកសាខានៅក្នុងគោលដៅចូលរួមចំណែកអភិវឌ្ឍសេដ្ឋកិច្ចតាមរយៈវិស័យដឹកជញ្ជូនបញ្ញើរហ័សក្នុងប្រទេសកម្ពុជា។
ក្រុមហ៊ុនJet’s Express bambodia មានសេវាកម្មបញ្ញើរហ័ស មានការធានាលើការបាត់បង់ ឬបាក់បែកទំនិញរបស់ប្រជាពលរដ្ឋ មានការទទួលខុសត្រូវខ្ពស់ និងមានសេវាកម្មគ្រប់គ្រងឃ្លាំង សេវាដឹកជញ្ជូនអន្តរជាតិ ដែលមានការដឹកនាំតាមកប៉ាល់ សេវាបញ្ញើទំនិញពីក្រៅប្រទេស និងសេវាកម្មប្រឹក្សាយោបល់ទាក់ទងទៅនឹងការគ្រប់គ្រង។ សម្រាប់ផែនការក្នុងឆ្នាំ ២០២២ ក្រុមហ៊ុន គ្រោងបង្កើតសាខាបន្ថែមឱ្យដល់ ១០០០ សាខា ដើម្បីចាប់យកចំណែករបស់ទីផ្សារសេវាបញ្ញើទូទាំងប្រទេស និងក្នុងគោលដៅនាំកេរ្តិ៍ឈ្មោះកម្ពុជាទៅលើឆាកអន្តរជាតិ។
៤. ឧកញ៉ា ហេង បូរិន ៖ ប្រធានក្រុមប្រឹក្សាភិបាល អាឡាដាំង អិច ប្រេស (ដឹកជញ្ជូនទំនិញអនឡាញ)
លោកឧកញ៉ា ហេង បូរិន ត្រូវបានគេដឹងថា គឺជាអ្នកជំនួញម្នាក់ ដែលមានក្រុមហ៊ុនជាច្រើននៅក្នុងដៃ។
លោក ក៏ជាអគ្គនាយក ប្រសិទ្ធិភាព ក្រេឌីត ភីអិលស៊ី, ប្រធានក្រុមប្រឹក្សាភិបាល អាឡាដាំង អិច ប្រេស (ដឹកជញ្ជូនទំនិញអនឡាញ), សហស្ថាបនិក អង្គរ អ៊ីប៊ុកឃីង អិចប្រេស (ដឹកជញ្ជូនមនុស្ស) និងជាម្ចាស់បុរី ហេង បូរិន ។
