សមិទ្ធផលមួយចំនួន ក្នុងនោះមានរោងជាងជួសជុលនាវា (Drydock, Slipway) ផែសំចត និងស្តារឃ្លង នៅមជ្ឈមណ្ឌលទំនើបកម្មមូលដ្ឋានសមុទ្ររាម បានបើកការដ្ឋានសាងសង់ជាផ្លូវការហើយ ក្រោមវត្តមាន សម្តេចពិជ័យសេនា ទៀ បាញ់ រដ្ឋមន្ត្រីក្រសួងការពារជាតិ និងលោក វ៉ាង វិនធាន ឯកអគ្គរដ្ឋទូតចិន ប្រចាំកម្ពុជា កាលថ្ងៃទី៨ ខែមិថុនា ឆ្នាំ២០២២នេះ។
ការការដ្ឋានសាងសង់រោងជាងជួសជុលនាវា ផែសំចត និងស្តារឃ្លងនេះ គឺជាជំនួយឥតសំណងរបស់រដ្ឋាភិបាលចិន ដល់កងទ័ពជើងទឹកកម្ពុជា ផ្ដោតលើចំណុចសំខាន់ៗដូចខាងក្រោម៖
ទី១៖ រៀបចំស្តារទីតាំងរបស់កងទ័ពជើងទឹក នៅមូលដ្ឋានរាមសំដៅធ្វើឱ្យមានលទ្ធភាពគ្រប់គ្រងពិតប្រាកដលើទីតាំងភូមិសាស្ត្រដែលមានស្រាប់ ឱ្យមានជំរុំបន្ទាយដែលមានអគារទីបញ្ជាការ, អគារបំពេញការងារគ្រប់ផ្នែកដូចជា៖ អគារសាលប្រជុំ, អគារឃ្លាំង, អគារកម្សាន្ត, អាហារដ្ឋាន, ទីលានកីឡា, អគារទទួលភ្ញៀវជាតិ-អន្តរជាតិស្តង់ដារកម្រិតខ្ពស់, ការកសាងប្រព័ន្ធអគ្គិសនី, ប្រព័ន្ធទឹកស្អាត, ប្រព័ន្ធលូបង្ហូរទឹក។ល។
ទី២៖ ជួយជួសជុលនាវាចាស់ៗ ដែលអស់ពេលវេលាប្រើប្រាស់ ដែលកងទ័ពជើងទឹកភាគីកម្ពុជា ពុំមានលទ្ធភាពជួសជុល ចំនួន០៨គ្រឿង យកទៅជួសជុលនៅប្រទេសចិន និងដុកបណ្តែតចំនួន ០២គ្រឿង (០១គ្រឿង ចំណុះ ៦០០តោន ជួសជុលនៅប្រទេសចិន និង ០១គ្រឿងទៀត ចំណុះ ៧០០តោន ជួសជុលនៅប្រទេសកម្ពុជា) និងជួយបំពេញបន្ថែមនូវនាវាសម្រាប់បម្រើការបច្ចេកទេសដូចជា៖ នាវាអូសសណ្ដោងចំនួន ០២គ្រឿង (ទំហំផ្ទុក ១០០តោន ចំនួន០១គ្រឿង និង៥០តោន ចំនួន០១គ្រឿង) នាវាដឹកស្បៀងគ្រឿងបរិក្ខារ ចំនួន ០១គ្រឿង និងត្រៀមលើកគម្រោងសម្ភារៈ ឧបករណ៍ផ្សេងៗទៀត តាមការខ្វះខាតជាក់ស្តែង។
ទី៣៖ ជួយកសាង និងពង្រីកបន្ថែមមន្ទីរពេទ្យ ០១កន្លែង សម្រាប់បម្រើការងារផ្ទៃក្នុងរបស់កងទ័ពជើងទឹក និងប្រជាជនដែលរស់នៅក្បែរខាងក្នុងតំបន់
ទី៤៖ ជួយកសាងរោងជាងជួសជុលនាវា អ៊ូ (Drydock) និងរ៉ៃ (Slipway) សម្រាប់បម្រើឱ្យការជួសជុលនាវាគ្រប់ប្រភេទដែលកងទ័ពជើងទឹកកម្ពុជា កំពុងប្រើប្រាស់កាត់បន្ថយការបញ្ជូនទៅជួសជុលនៅក្រៅប្រទេស និងបន្ថយការចំណាយថវិកាជាតិខ្ជះខ្ជាយ លើកកម្ពស់ការបង្ហាត់បង្រៀនអ្នកឯកទេសគ្រប់ផ្នែក ទាំងគ្រឿងបំពាក់ ដែលមានលើនាវាដោយខ្លួនឯង រៀនបើកបរ ជួសជុលថែទាំ និងសិក្សាស្រាវជ្រាវ លើកកម្រិតសមត្ថភាពជាអ្នកឯកទេស អាចជួសជុល ឬរៀបតម្លើងនាវាធុនមធ្យមល្មមៗ ដោយខ្លួនឯង សិក្សាច្បាប់ទម្លាប់ វិស័យផ្ទៃសមុទ្រ សម្រាប់ជាតិ និងអន្តរជាតិដើម្បីពង្រីកកិច្ចសហប្រតិបត្តិការជាមួយបណ្តាប្រទេសក្នុងតំបន់ និងពិភពលោក។
ទី៥៖ ជួយកសាងផសំចតចំនួន០២កន្លែង បើកទូលាយសម្រាប់សំចតនាវាធុនស្រាល និងមធ្យម។
ទី៦៖ ជួយស្ដារឃ្លងមានស្រាប់ ដែលជម្រៅទឹកនៅរាក់នៅឡើយ ឱ្យមានលទ្ធភាពទូលំទូលាយសម្រាប់នាវាធុនមធ្យមចរាចរចេញចូលបានដោយរលូន។
ទី៧៖ បានផ្តល់នូវឯកសណ្ឋានយោធាសម្រាប់កងទ័ពជើងទឹកកម្ពុជាប្រើប្រាស់ មានចំនួន០៧ប្រភេទ ស្មើនឹង ៣៦,៩០០កំប្លេ។
គួរបញ្ជាក់ដែរថា ក្រៅពីបើកការដ្ឋានសាងសង់នៅសមិទ្ធិផលសំខាន់ៗជាច្រើនខាងលើនេះ គណៈកម្មការ នៃប្រទេសទាំងពីរ ក៏កំពុងបន្តសិក្សាស្វែងយល់អំពីការបំពេញតម្រូវការផ្សេងៗមួយចំនួនទៀត សម្រាប់ហ្វឹកហាត់ជំនាញរបស់កងទ័ពជើងទឹកឱ្យមានសមត្ថភាពបំពេញភារកិច្ចការពារសន្តិសុខ ស្ថេរភាព សណ្តាប់ធ្នាប់ ការជួយសង្គ្រោះគ្រោះមហន្តរាយ អំពើភេវរកម្មហិង្សា ការជួញដូរអាវុធ គ្រឿងញៀនខុសច្បាប់ ទប់ស្កាត់រាល់បាតុភាពដែលអាចកើតឡើងដោយសហការជាមួយប្រទេសក្នុងតំបន់ និងអន្តរជាតិ៕ អត្ថបទ៖រង្សី
