ស្រ្តីវ័យក្មេងម្នាក់ធ្លាប់តែធ្វើការរោងចក្រ បែរមកចាប់មុខរបរលក់កូនដំណាំគ្រប់ប្រភេទ ដើម្បីរកចំណូលផ្គត់ផ្គង់គ្រួសារ។
អ្នកស្រី ស្រី លក្ខ័ ដែលមានស្រុកកំណើតនៅស្រុកអូររាំងឪ ខេត្តត្បូងឃ្មុំ បានផ្លាស់ទីលំនៅមករស់នៅភូមិរំចេក សង្កាត់រតនៈ ខេត្តបាត់ដំបង ដោយប្រកបមុខរបរលក់កូនដំណាំលក់។ ពីដើមឡើយ ស្រ្តីរូបនេះធ្វើជាកម្មការនីរោងចក្រជាង ៥ ឆ្នាំ ទើបងាកមកចាប់ជាមុខរបរថ្មីដោយខ្លួនឯងគឺ បណ្តុះកូនដំណាំ និងទទួលទិញលក់កូនដំណាំគ្រប់ប្រភេទជាង ៣ ឆ្នាំមកហើយ។
បើតាមស្រ្តីរូបនេះបានប្រាប់ពីមូលហេតុមកចាប់មុខរបរមួយនេះឡើង គឺដោយសារទី១ គឺចង់ឈប់ធ្វើការឲ្យគេមកធ្វើការឲ្យខ្លួនឯងវិញ។ ទី២ ជាការចូលចិត្តកសិកម្ម ស្រលាញ់ធម្មជាតិ និងទី៣ គឺការចង់សាកល្បង។
ស្រ្តីរូបនេះបានប្រាប់ឧកញ៉ាញូស៍ថា កូនដំណាំដែលបណ្តុះខ្លួនឯង និង ទិញពីគេយកមកលក់រាល់ថ្ងៃ មានប្រមាណ ៩០ ប្រភេទដែលរួមមាន ពូជដូង មៀន សាវម៉ាវ ស្វាយ ភ្ញៀវ ត្របែក ក្រូច ល្ហុង ម្កាក់ ចេក ជម្ពូ រួមទាំងប្រភេទផ្កាជាច្រើនទៀត។ កូនដំណាំភាគច្រើនជាប្រភេទផ្សាំមែកជាងបណ្តុះគ្រាប់ ព្រោះភ្ញៀងចូលចិត្តទិញជាប្រភេទផ្សាំ។
ស្រ្តីវ័យក្មេងរូបនេះ បានបង្ហើបពីចំណូលដែលទទួលបានក្នុងមួយខែខ្ទង់ ៣០០ទៅ៦០០ដុល្លារ ពោលគឺ ១០ម៉ឺនរៀល ទៅ២០ម៉ឺនរៀលក្នុងមួយថ្ងៃទៅតាមរដូវ ហើយរដូវដែលអំណោយផលគឺខែវស្សា។
ស្រ្តីដែលទើបចាប់ផ្តើមរបរថ្មីថ្មោងនេះ ក៏ប្រាប់ពីវិធីបណ្តុះកូនល្ហុងដើម្បីឲ្យបានល្អ។ សំខាន់លើដី គួរជ្រើសរើសយក
ដីម៉ត់ល្អ លាយជីកំប៉ុស និងប្រភេទគ្រាប់ល្ហុង ត្រូវជ្រើសរើសពូជល្អយកទៅត្រាំទឹកមួយយប់ ទើបអាចដាក់
បណ្តុះបាន។
ស្រ្តីរូបនេះ ក៏លើកបញ្ហាប្រឈមខ្លះៗក្នុងមុខរបរដូចជា នៅពេលទទួលទិញពីគេមានដំណាំរលួយ ឬងាប់មួយចំនួន។ មួយទៀតពេលដែលផ្ញើអីវ៉ាន់ឲ្យភ្ញៀវ ក៏មានបញ្ហាងាប់បាក់បែកផងដែរ។
ជាចុងក្រោយ ស្រី ល័ក្ខ រំពឹងខ្ពស់ទៅលើមុខរបរថ្មីរបស់ខ្លួន ទី១ ព្រោះភ្ញៀវដែលធ្លាប់ទិញពីមុននៅតែបន្តគាំទ្ររហូត នេះមកពីការយកចិត្តទុកដាក់របស់គាត់ចំពោះអតិថិជន។ ទី២ បានមើលឃើញថាពីមួយឆ្នាំទៅមួយឆ្នាំ តែងតែមានភ្ញៀវមកទិញកាន់តែច្រើន កាន់តែកើន ដោយភាគច្រើនអតិថិជនដែលទទួលបានគឺតាមរយៈអនឡាញ៕
