ក្នុងការប្រណាំងទូកនាគចំណុះ១២នាក់ ចម្រុះបុរស-នារី ចម្ងាយ ៥០០ម៉ែត្រ ទូកមកពីឃុំព្រែកតាទែន សុ្រកពញាឮ ខេត្តកណ្ដាល បានយកឈ្នះលើទូករបស់ខេត្តកំពង់ចាមទាំង២ជើង ទាំងខ្សែទឹកខាងក្នុងនិងខ្សែទឹកខាងក្រៅ ក្នុងវគ្គផ្ដាច់ព្រ័ត្រ ដោយបានមកដល់ទីមុនគូប្រកួតទាំង២ជើង។ ក្នុងជើងទី១ ទូកជើងឯកចំណុះ ចម្រុះបុរស-នារីនេះបានថេរៈវេលា ៤នាទី ១៦វិនាទី ចុច២៥ និង ជើងទី២ ចំណាយពេល ៤នាទី២១វិនាទីចុច០២ សរុបទាំង២ជើង ប្រើថេរៈវេលា ៨នាទី ៣៧វិនាទី ដោយបានចំណាយពេលតិចជាង ទូកខេត្តកំពង់ចាម។
ចំណែកទូករបស់ខេត្តកណ្ដាល១ទៀតឈរនៅចំណាត់ថ្នាក់លេខ២ ឯទូកខេត្តកំពង់ចាមជាប់ចំណាត់ថ្នាក់លេខ៣។ វិញ្ញាសាទូកអុំប្រពៃណីខ្នាតអន្ដរជាតិ ឬ ទូកនាគ បុរសចំណុះ១២នាក់ចម្ងាយ ១.០០០ម៉ែត្រ និង នារីចម្ងាយ៥០០ម៉ែត្រ ពាក់កណ្ដាលផ្ដាច់ព្រ័ត្រ និងផ្ដាច់ព្រ័ត្រ ធ្វើឡើងនៅទី២៩ ខែមករា ឆ្នាំ២០២០នេះ។
ការប្រកួតកីឡាទូកប្រពៃណីខ្នាតអន្ដរជាតិ ទូកនាគ ជ្រើសរើសជើងឯក ភូមិភាគវាលរាប ពានរង្វាន់សម្ដេចក្រឡាហោម ស ខេង លើកទី២ ឆ្នាំ២០២០ ចាប់ផ្ដើមប្រកួតជាផ្លូវការ កាលពីរសៀលថ្ងៃទី២៨ ខែមករា ឆ្នាំ២០២០ នៅដងទន្លេបាសាក់ ទីក្រុងតាខ្មៅ ខេត្តកណ្ដាល ដើម្បីជំរុញចលនាកីឡានេះឱ្យកាន់តែសកម្មផុលផុស ក្នុងបំណងសម្រិតសម្រាំងរកទូកខ្លាំងៗទៅចូលរួមប្រកួតនៅថ្នាក់ជាតិ ពិសេសសម្រួចទិសដៅឆ្ពោះធ្វើម្ចាស់ផ្ទះកីឡាស៊ីហ្គេម លើកទី៣២ នាឆ្នាំ២០២៣ខាងមុខនេះនៅកម្ពុជា ។
កញ្ញា មាស តឿ មន្ដ្រីសហព័ន្ធកីឡាទូកកានូ និងរ៉ូអ៊ីងកម្ពុជា បានឱ្យដឹងថា ការប្រកួតទូកប្រពៃណីខ្នាតអន្ដរជាតិ «ទូកនាគ» ឆ្នាំនេះ គណៈកម្មការរៀបចំបានចម្រាញ់យកតែទូក ខ្លាំងៗប៉ុណ្ណោះសម្រាប់ចូលរួមក្នុងការប្រកួតថ្នាក់ជាតិ ដែលសរុបមានចំនួន ១២ក្រុមចូលរួម។ ក្នុងនោះមានទូក បុរស៦ក្រុម ទូកនារី៣ក្រុម និងទូកចម្រុះបុរស-នារី៣ក្រុម ប្រកួតលើវិញ្ញាសា ចំណុះ១២នាក់ ចម្ងាយ៥០០ម៉ែត្រចម្រុះបុរស-នារី និងចំណុះ១២នាក់ ចម្ងាយ ១.០០០ម៉ែត្រ បុរស។ ការប្រកួតក្នុង១ដំណាក់កាល មាន២ជើង គឺខ្សែទឹកខាងក្រៅ និង ខ្សែទឹកខាងក្នុង ដោយគិតរយៈពេលក្រុមដែលទទួលបានថេរៈវេលាតិចជាងគេ គឺជាទូកដែលឈ្នះ បានឡើងទៅប្រកួតនៅវគ្គពាក់កណ្ដាលផ្ដាច់ព្រ័ត្រ និង ផ្ដាច់ព្រ័ត្រ៕
