បើនិយាយដល់រឿងប្រេងឥន្ធនៈ គ្រប់គ្នាប្រាកដជានឹកឃើញដល់អាណាចក្រប្រេងដូចជា អារ៉ាប់រួម និងអារ៉ាប៊ីសាអូឌីតជាដើម ហើយប្រាកដជាមានកូនចិត្តមួយយល់ថា ពួកគេគឺជាប្រភពផលិតប្រេងធំបំផុតលើលោកជាមិនខាន។
ប៉ុន្តែការពិតមិនដូច្នោះឡើយ ពោលប្រទេសផលិតប្រេងបានច្រើនបំផុតលើលោកគឺជាសហរដ្ឋអាមេរិកទៅវិញទេ ដែលជាអ្នកផលិតប្រេងបានច្រើនបំផុតលើលោក។ នេះបើតាមការទិន្នន័យផ្ដល់ឲ្យដោយ Investopedia។
ក្នុងមួយថ្ងៃ អាមេរិកអាចផលិតប្រេងបាន ១៨,៨៨ លានបារ៉ែល ឬប្រហែល ២០% នៃប្រេងសរុបក្នុងលោក ខណៈអារ៉ាប៊ីសាអូឌីផលិតបាន ១០,៨៤ លានបារ៉ែល ស្របពេលរុស្ស៊ីផលិតបាន ១០,៧៨ លានបារ៉ែល។
ថ្វីបើជាប់ឈ្មោះជាប្រទេសផលិតប្រេងបានច្រើនបំផុតលើលោកក្ដី ប៉ុន្តែអាមេរិកក៏ជាប្រទេសប្រើប្រាស់ប្រេងច្រើនបំផុតដូចគ្នា ដោយក្នុងមួយថ្ងៃពួកគេប្រើប្រាស់ប្រេងប្រហែល ២០,៥៤ លានបារ៉ែលឯណោះ ដែលមានន័យថា តម្រូវការមានលើសការផលិត តម្រូវឲ្យពួកគេត្រូវតែនាំចូលប្រេងពីបរទេស។
ដោយឡែក ប្រទេសដែលនាំចេញប្រេងធំបំផុតលើលោកវិញគឺ អារ៉ាប៊ីសាអូឌីដែលរ៉ាប់រងតួនាទីមួយនេះ ដោយកាលពីឆ្នាំ ២០២០ ពួកគេនាំចេញប្រេងរហូតដល់ជិត ១០០ ពាន់លានដុល្លារ ស្របពេលរុស្ស៊ីឈរនៅលេខ ២ ខណៈស្ដេចត្រាញ់ប្រេងទាំង ២ នេះ ពូកែផលិត ប៉ុន្តែមិនសូវប្រើប្រាស់ ពោលអារ៉ាប៊ីសាអូឌីតប្រើប្រាស់ប្រេងប្រហែល ៣,២ លានបារ៉ែលក្នុងមួយថ្ងៃ ស្របពេលរុស្ស៊ីប្រហែល ៣,៧ លានបារ៉ែល។ នេះបើតាមទិន្នន័យផ្ដល់ឲ្យដោយ EIA៕
