អង្ករជាទំនិញនាំចេញដ៏សំខាន់សម្រាប់កម្ពុជា ដោយអង្ករក្រអូបបង្ហាញពីសក្តានុពលដ៏ជោគជ័យ។ ជាមួយនឹងការកើនឡើងនៃការប្រកួតប្រជែងនៅក្នុងតំបន់ ការរំពឹងទុកនៃកំណើននាំចេញកំពុងស្ថិតក្រោមការគំរាមកំហែង ដូច្នេះទើបមានតម្រូវការបន្ទាន់ ដើម្បីគាំទ្រដល់ការផ្សព្វផ្សាយទំនិញទាំងនេះ ទៅកាន់ទីផ្សារអន្តរជាតិ។
កម្មវិធីខ្សែសង្វាក់តម្លៃកសិកម្មកម្ពុជា-អូស្ត្រាលី (CAVAC) ដែលជាកម្មវិធីអភិវឌ្ឍន៍អូស្ត្រាលីដ៏ធំបំផុតនៅកម្ពុជា បានគាំទ្រដល់សហព័ន្ធស្រូវអង្ករកម្ពុជា ក្នុងការអភិវឌ្ឍម៉ាកសញ្ញា ពាណិជ្ជសញ្ញា និងយុទ្ធនាការផ្សព្វផ្សាយ ដើម្បីដោះស្រាយបញ្ហាគម្លាតទីផ្សារ។
CAVAC សហការយ៉ាងជិតស្និទ្ធជាមួយ ក្រសួងកសិកម្ម រុក្ខាប្រមាញ់ និងនេសាទ, ក្រសួងពាណិជ្ជកម្ម, អគ្គនាយកដ្ឋានកសិកម្ម, វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា, សហព័ន្ធស្រូវអង្ករកម្ពុជា និងអ្នកពាក់ព័ន្ធផ្សេងៗទៀត បានដាក់ឱ្យដំណើរការនូវម៉ាកសមូហភាពនៃ ‘SKO’ អង្ករសែនក្រអូប និង ‘DSMK’ អង្ករដំណើបនៃពូជស្រូវដំណើបស្បៃមង្គល ដើម្បីពង្រឹងតម្លៃស្រូវ និងលើកកម្ពស់ជីវភាពអាជីវកម្មខ្នាតតូចនៅកម្ពុជា។ ពិធីសម្ពោធនេះមានការចូលរួមពីមន្ត្រីក្រសួង ស្ថាប័នរដ្ឋាភិបាល និងស្ថានទូតអូស្ត្រាលីប្រចាំរាជធានីភ្នំពេញ កាលពីចុងខែមិថុនា។
ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា “ការលើកកម្ពស់ម៉ាក ‘SKO និង DSMK’ គឺមានសារៈសំខាន់ខ្លាំងណាស់ ក្នុងការពង្រឹងអត្តសញ្ញាណអង្កររបស់កម្ពុជា និងជំរុញការប្រកួតប្រជែងនៃវិស័យអង្ករក្នុងប្រទេស ជាពិសេសការវាយលុកទីផ្សារអន្តរជាតិ។ ខ្ញុំសូមអរគុណ កម្មវិធី CAVAC ដែលបានគាំទ្រវិស័យកសិកម្ម ហើយយើងសង្ឃឹមថានឹងមានកិច្ចសហប្រតិបត្តិការបន្ថែមទៀត ដើម្បីលើកកម្ពស់កសិឧស្សាហកម្ម និងការនាំចេញរបស់កម្ពុជា”។
គួរបញ្ជាក់ថា ការនាំចេញស្រូវ-អង្ករពីកម្ពុជាទៅទីផ្សារអន្តរជាតិក្នុងឆមាសទី១ ឆ្នាំ ២០២២ មានបរិមាណសរុបជាង ២ លានតោន ដោយប្រមូលបានប្រាក់ជាង ៦១៥ លានដុល្លារ កើនជិត ១០០ លានដុល្លារបើធៀបរយៈពេលដូចគ្នាឆ្នាំ ២០២១។ អង្ករដែលកម្ពុជានាំទៅទីផ្សារអន្តរជាតិក្នុងឆមាសទី១ ឆ្នាំ ២០២២ រួមមានអង្ករក្រអូបគ្រប់ប្រភេទ ២០៧ ២៧១ តោន ស្មើនឹង ៦៣,៣៥ ភាគរយនៃបរិមាណនាំចេញសរុប, អង្ករស ១១៣ ៦១៧ តោន ស្មើ ៣៤,៧២ ភាគរយ និងអង្ករចំហុយគ្រប់ប្រភេទ ៦ ៣១២ តោន ស្មើនឹង ១,៩៣ ភាគរយ។ នេះបើយោងតាមទិន្នន័យពីក្រសួងកសិកម្ម រុក្ខាប្រមាញ់ និងនេសាទ៕
