នៅក្រោយកិច្ចព្រមព្រៀងសន្តិភាពទីក្រុងប៉ារីស លោក គន់ គីម បានធ្វើជាអភិបាលរងខេត្តកណ្ដាល និងជាមនុស្សសំខាន់នៅក្នុងជួរគណបក្សប្រជាជនកម្ពុជា។ លោកបានដើរតួនាទីកាន់តែសំខាន់នៅរវាងឆ្នាំ១៩៩៤ ដល់៩៥ នៅពេលសម្តេចតេជោ ហ៊ុន សែន នាយករដ្ឋមន្រ្តី បង្កើតទីបញ្ជាការដ្ឋានកងទ័ពថ្មីនៅទួលក្រសាំង។
លោក គន់ គីម កើតនៅឆ្នាំ១៩៥៤ ក្នុងភូមិចាន់ទូង ឃុំស្រឡប់ ស្រុកត្បូងឃ្មុំ ខេត្តកំពង់ចាម ដែលបច្ចុប្បន្នឋិតក្នុងភូមិសាស្ត្រនៃខេត្តត្បូងឃ្មុំ។ លោកបានចូលរួមជាមួយខ្មែរក្រហមតាំងតែពីមុនឆ្នាំ១៩៧៥ ដោយមានតួនាទីជាកងឈ្លប និងបន្ទាប់មកជាអង្គរក្សអោយលេខាបក្សស្រុកត្បូងឃ្មុំនៅ ភូមិភាគបូព៌ាតំបន់២១។
នៅពេលដែលរបបខ្មែរក្រហមគ្រប់គ្រងអំណាចលោក គន់ គីម មានតួនាទីជាប្រធានមន្ទីរសន្តិសុខស្រុកត្បូងឃ្មុំ ប៉ុន្តែលោកត្រូវប្តូរចេញពីស្រុកត្បូងឃ្មុំ ទៅធ្វើប្រធានមន្ទីរសន្តិសុខខេត្តកណ្ដាលវិញ។ នៅក្រោយកិច្ចព្រមព្រៀងសន្តិភាពទីក្រុងប៉ារីស លោក គន់ គីម បានធ្វើជាអភិបាលរងខេត្តកណ្ដាល និងជាមនុស្សសំខាន់នៅក្នុងជួរគណបក្សប្រជាជនកម្ពុជាប្រចាំក្នុងខេត្តកណ្ដាល។
លោក គន់ គីម ត្រូវបានរដ្ឋាភិបាលតម្លើងសក្តិជានាយឧត្តមសេនីយ៍ផ្កាយ៤ កាលពីឆ្នាំ២០០៧ និងធ្លាប់ជាប្រធានគណៈកម្មការទប់ស្កាត់ការកាប់បំផ្លាញព្រៃឈើថែមទៀត។ មុខតំណែង និងតួនាទីរបស់លោកចេះតែឡើងខ្ពស់ជាបន្តបន្ទាប់ ដោយនៅក្នុងឆ្នាំ២០០៩ លោកបានក្លាយជាសមាជិកអចិន្ត្រៃយ៍នៃគណបក្សប្រជាជនកម្ពុជា និងត្រូវបានតែងតាំងជានាយសេនាធិការចម្រុះនៃកងយោធពលខេមរភូមិន្ទ ក្រសួងការពាជាតិ។
ក្នុងឆ្នាំ២០១៩ ទេសរដ្ឋមន្ត្រីទទួលបន្ទុកបេសកកម្មពិសេស លោក គន់ គីម ក៏ត្រូវបានរាជរដ្ឋាភិបាលតែងតាំងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ជំនួស លោក ញឹម វណ្ណដា ដែលត្រូវតែងតាំងជាទីប្រឹក្សារាជរដ្ឋាភិបាល ឋានៈស្មើទេសរដ្ឋមន្ដ្រី។ បច្ចុប្បន្នលោក គន់ គីម ជាអនុប្រធាន និងជាអគ្គលេខាធិការ សមាគមអតីតយុទ្ធជនកម្ពុជា។
គួររម្លឹកថា កាលពីឆ្នាំ២០១៩ ក្រសួងរតនាគាររបស់សហរដ្ឋអាមេរិក បានសម្រេចដាក់ទណ្ឌកម្មហិរញ្ញវត្ថុ និងរឹតត្បិតទិដ្ឋាការ លោក គន់ គីម និងសមាជិកគ្រួសារ ៣នាក់ និងក្រុមហ៊ុនមួយចំនួនទៀត ពោលគឺលើប្រពន្ធរបស់លោក អ្នកស្រី គីង ចាន់ឌី និងកូន២នាក់ទៀត គឺអ្នកស្រី គីម សុផារី និង លោក គីម ផារ៉ា។
ចំណែកក្រុមហ៊ុនដែលពាក់ព័ន្ធនឹងក្រុមគ្រួសារលោក គន់ គីម រួមមាន៖ ក្រុមហ៊ុន ៧មករា ផារី (7 Makara Phary Co., Ltd.) ចុះបញ្ជីក្រោមឈ្មោះ អ្នកស្រី គីម សុផារី ទទួលបានដីសម្បទានជាច្រើនពាន់ហិកតារនៅក្នុងខេត្តរតនគិរី។ ក្រុមហ៊ុនចំការកៅស៊ូខេឌី (K D Rubber Plantation Co., Ltd) ជារបស់អ្នកស្រី គីង ចាន់ឌី ក្រុមហ៊ុនសន្តិសុខខេមបូ អេលីត (Cambo Elite Security Force Co., Ltd.) កាន់កាប់ដោយអ្នកស្រី គីម សុផារី និងក្រុមហ៊ុនរំដួលអភិវឌ្ឍន៍ (Romdoul Development Co., Ltd.) កាន់កាប់ដោយលោក គីម ផារ៉ា។
នៅថ្ងៃទី២៧ ខែកក្កដា ឆ្នាំ២០២២នេះ កូនប្រុសលោក គន់ គីម សមាជិកណៈអចិន្ត្រៃយ៍ នៃគណកម្មាធិការកណ្តាល និងជាប្រធានក្រុមការងារចុះជួយខេត្តឧត្តរមានជ័យរបស់គណបក្សប្រជាជនកម្ពុជា លោក គីម រិទ្ធី ក៏ត្រូវបានតែងតាំងជាអភិបាលខេត្តព្រះវិហារ មានឋានន្ដរស័ក្ដិឧត្តមមន្ដ្រី ថ្នាក់លេខ៣ ជំនួសលោក ប្រាក់ សុវណ្ណ ត្រូវបានដាក់ឲ្យចូលនិវត្តន៍។
លោក គីម រិទ្ធី អតីតជាអភិបាលរងខេត្តកណ្ដាល និងបច្ចុប្បន្នមុនឡើងកាន់តួនាទីជាអភិបាលខេត្តព្រះវិហារនេះ លោកមានតួនាទីជាអគ្គនាយករង នៃអគ្គនាយកដ្ឋានរដ្ឋបាលក្រសួងមហាផ្ទៃ កាលពីថ្ងៃទី១៤ ខែកុម្ភៈ ឆ្នាំ២០២២។ លើសពីនេះ លោក គីម រិទ្ធី ក៏កំពុងកាន់តួនាទីជាប្រធានផ្នែកទំនាក់ទំនងនិងសហប្រតិបត្តិការជាតិ-អន្តរជាតិនៃយុវជនគណបក្សថ្នាក់កណ្តាល គណបក្សប្រជាជនកម្ពុជាផងដែរ៕
