លោក ឈា ឡាយហ៊ី ប្រធាននាយកដ្ឋានសហគ្រាសធុនតូច និងមធ្យម បានលើកពីលទ្ធផលសម្រេចបានសម្រាប់រយៈពេល ៥ ឆ្នាំ (២០១៧-២០២១) របស់អគ្គនាយកដ្ឋានសហគ្រាសធុនតូច និងមធ្យម និង សិប្បកម្ម។
លោក ឈា ឡាយហ៊ី បានបញ្ជាក់ក្នុងសន្និសីទពីវឌ្ឍនភាពក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍នៅព្រឹកនេះថា នៅក្នុងរយៈពេល ៥ ឆ្នាំ គិតចាប់ពីឆ្នាំ ២០១៧ ដល់ ២០២១ (គិតត្រឹមខែតុលា) ក្រសួងបានចុះបញ្ជីមូលដ្ឋានបង្កើតថ្មីមានចំនួន ៣,៩៥៣ មូលដ្ឋាន និងផ្តល់វិញ្ញាបនបត្របន្តដំណើរការចំនួន ២,៧១២ មូលដ្ឋាន។
លោកបន្តថា រាជរដ្ឋាភិបាលកម្ពុជាបានចាត់ទុកវិស័យសហគ្រាស ធុនមីក្រូ តូច និងមធ្យម ជាមូលដ្ឋានដ៏សំខាន់មួយសម្រាប់អភិវឌ្ឍន៍សេដ្ឋកិច្ចជាតិ និងសង្គម ពីព្រោះវិស័យនេះមានលក្ខណៈអន្តរសកម្មភាពច្រើន ងាយបត់បែន និងសម្របខ្លួនបានយ៉ាងឆាប់រហ័សទៅតាមកាលៈទេសៈនៃការអភិវឌ្ឍបច្ចេកវិទ្យា។
ការងារចុះបញ្ជី សហគ្រាសធុនតូចនិងមធ្យម និងសិប្បកម្មក្នុងបរិបថនៃការអភិវឌ្ឍសេដ្ឋកិច្ចនៅក្របខណ្ឌតំបន់ និងពិភពលោក មានការរីកចម្រើនខ្លាំង តាមរយៈការធ្វើទំនើបកម្មឧស្សាហកម្ម ការអភិវឌ្ឍន៍បច្ចេកវិទ្យាទំនើបៗ។
បើតាមមន្រ្តីជាន់ខ្ពស់រូបនេះ គិតមកដល់ខែតុលា ឆ្នាំ២០២១នេះ ក្រសួងបានចុះបញ្ជីមូលដ្ឋានសហគ្រាសធុនតូច មធ្យម និង សិប្បកម្មសរុបមានចំនួន ៤៣,២៧៦មូលដ្ឋាន និងបង្កើតការងារបានចំនួន ៤៣៥,៩០៥ នាក់៕
