វាគឺជារឿងធម្មតាដែលក្រុមមហាសេដ្ឋីមានៗកប់ពពកតែងតែធ្វើសប្បុរសធម៌ជាមួយនឹងអង្គការពិភពលោកធំៗ តួយ៉ាងដូចជា Bill Gates និង Warren Buffett ជាដើម ដែលតែងតែបញ្ចេញថវិកាផ្ទាល់ខ្លួនធ្វើកម្មវិធីសប្បុរសធម៌ផ្សេងៗ។
ក្នុងចំណោមមហាសេដ្ឋីដែលឧស្សាហ៍បរិច្ចាគប្រាក់បំផុត ក៏មានអតីតភរិយាស្ថាបនិក Amazon លោកស្រី MacKenzie Scott ផងដែរ តួយ៉ាងកាលពីសប្ដាហ៍មុនលោកស្រីបានបរិច្ចាគទឹកប្រាក់ ១២២ លានដុល្លារទៅកាន់អង្គការក្រៅរដ្ឋាភិបាល Big Brothers of America។
ជាមួយនឹងសកម្មភាពបរិច្ចាគប្រាក់ជាញឹកញាប់មួយនេះ បានធ្វើឲ្យលោកស្រី MacKenzie ក្លាយជាមហាសេដ្ឋីចិត្តធម៌បំផុតមួយរូប ហើយបើតាមទិន្នន័យ ៣ ឆ្នាំចុងក្រោយនេះវិញ លោកស្រីបរិច្ចាគទឹកប្រាក់ប្រហែល ១២ ពាន់លានដុល្លារ។ នេះបើតាមការចុះផ្សាយពី Celebritynetworth។
ប្រភពដដែលបានបន្ថែមថា ការធ្វើសប្បុរសធម៌របស់លោកស្រីបានធ្វើឲ្យមហាសេដ្ឋីមួយចំនួនដែលមានទ្រព្យច្រើនជាងបាក់មុខមិនស្ទើរ ដូចជា Mark Zuckerberg ជាដើមដែលបរិច្ចាគបានប្រហែល ៣ ពាន់លានដុល្លារតាំងពីដើមមកទល់បច្ចុប្បន្ន៕
