ដូចដែលប្រិយមិត្តធ្លាប់បានដឹងរួចមកហើយថា ប្រទេសស្រីលង្កាកន្លងមកគឺបានជួបនឹងវិបត្តិសេដ្ឋកិច្ចយ៉ាប់យ៉ឺនបំផុតមិនធ្លាប់មាន រហូតប្រជាពលរដ្ឋនាំគ្នាបះបោរធ្វើបាតុកម្មទម្លាក់ប្រធានាធិបតីថែមទៀត។
យ៉ាងណា ស្ថានការណ៍ហាក់ប្រែជាស្ងប់ស្ងាត់បានមួយរយៈ ក្រោយការបោះឆ្នោតជ្រើសរើសប្រធានាធិបតីថ្មីបានបញ្ចប់ ហើយជាមួយការកាន់តំណែងមួយនេះ រដ្ឋាភិបាលថ្មីប្ដេជ្ញាចិត្តថា នឹងជួយស្ដារសេដ្ឋកិច្ចជាតិឲ្យវិលមកប្រក្រតីឡើងវិញ។
ដើម្បីអាចស្រោចស្រង់សេដ្ឋកិច្ចក្នុងស្រុកឲ្យដំណើរការឡើងវិញ ស្រីលង្កាចាំបាច់ត្រូវខ្ចីប្រាក់ពីស្ថាប័នអន្តរជាតិរាប់ពាន់លានដុល្លារ ហើយមូលនិធិរូបិយវត្ថុអន្តរជាតិ IMF គឺជាស្ថាប័នតែមួយគត់អាចជួយស្រីលង្កាបាន។
ទាក់ទងនឹងរឿងរ៉ាវមួយនេះ Reuters បានរាយការណ៍ថា ស្រីលង្កា និង IMF បានព្រមព្រៀងគ្នាបណ្ដោះអាសន្ន ក្នុងការផ្ដល់កម្ចីបន្ទាន់ដល់ប្រទេសដែលជួបវិបត្តិសេដ្ឋកិច្ចមួយនេះ ខណៈការប្រកាសផ្លូវការអាចនឹងធ្វើឡើងនៅថ្ងៃព្រហស្បតិ៍។
ប្រភពដដែលបានបន្ថែមថា ប្រទេសដីកោះមួយនេះទំនងអាចខ្ចីបំណុលប្រមាណ ៣ ពាន់លានដុល្លារពី IMF ដើម្បីដោះស្រាយបញ្ហាសេដ្ឋកិច្ចអាក្រក់បំផុត ដែលកើតមានក្នុងរយៈពេលច្រើនជាង ៧ ទសវត្សចុងក្រោយ៕
