សហរដ្ឋអាមេរិក និងប្រទេសនៅអឺរ៉ុបជាច្រើនបានព្រួតដៃគ្នាដាក់ទណ្ឌកម្មសេដ្ឋកិច្ចលើប្រទេសរុស្ស៊ី បន្ទាប់ពីមហាអំណាចមួយនេះបើកការឈ្លានពានទៅកាន់ប្រទេសជិតខាងអ៊ុយក្រែន។
បើទោះជាកំពុងស្ថិតក្នុងគំនាបទណ្ឌកម្មសេដ្ឋកិច្ចធ្ងន់ធ្ងរកម្រិតណា ក៏សេដ្ឋកិច្ចរុស្ស៊ីនៅតែមិនសូវទទួលរងផលប៉ះពាល់ជាដុំកំភួនឡើយ ផ្ទុយពីប្រទេសលោកខាងលិចដែលកំពុងប្រឈមនឹងហានិភ័យកង្វះខាតហ្គាសប្រើប្រាស់ ក្រោយរុស្ស៊ីប្រកាសថាផ្អាកផ្គត់ផ្គង់ហ្គាស ដើម្បីជួសជុលបំពង់បង្ហូរឧស្ម័នរបស់ខ្លួន។
ទន្ទឹមនឹងនោះ ប្រធានាធិបតីរុស្ស៊ី វ៉្លាឌីមៀរ ពូទីនបានបង្ហើបថា ប្រទេសនៅលោកខាងលិចគឺកំពុងជួបនឹងវិបត្តិធ្ងន់ធ្ងរ ដោយសារតែព្យាយាមដាក់ទណ្ឌកម្មសេដ្ឋកិច្ចលើរុស្ស៊ី ដែលជារឿងឥតបានការ ហើយអ្នកដែលទទួលបានប្រយោជន៍ធំពីរឿងនេះគឺ បណ្ដាប្រទេសនៅអាស៊ី ជាពិសេសគឺចិន ដែលជាសម្ព័ន្ធមិត្ត និងជាមហាអំណាចសេដ្ឋកិច្ចធំបំផុតលើលោកទី ២ តែម្ដង។ នេះបើតាមការចុះផ្សាយពី Reuters។
ប្រភពដដែលបានបង្ហើបទៀតថា បើទោះជាទណ្ឌកម្មសេដ្ឋកិច្ចដែលរុស្ស៊ីទទួលបានពីលោកខាងលិចមិនប៉ះពាល់ដល់សេដ្ឋកិច្ចធ្ងន់ធ្ងរ ប៉ុន្តែនៅតាមតំបន់ខ្លះក៏ទទួលផលប៉ះពាល់ផងដែរ ជាពិសេសលើផ្នែកឧស្សាហកម្ម៕
