អ្នកនាំពាក្យក្រសួងសុខាភិបាលបានបង្ហាញពីរបៀបនៃការបង្ការចម្លងមេរោគកូរ៉ូណា( COVID19) បានរយៈខ្យល់ និងឆ្លងតាមដំណក់តូចៗ ដូចជាការកណ្តាស់ ក្អកជាដើម។
នារសៀលថ្ងៃទី២៥ ខែកុម្ភៈ ឆ្នាំ២០២០ នៅទីស្ដីការក្រសួងសុខាភិបាល លោកវេជ្ជណ្ឌិត លី សូវ៉ាន់ អ្នកនាំពាក្យ និងជាប្រធាននាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល បានគូសបញ្ជាក់ថា ការឆ្លងមេរោគនេះត្រូវបានកំណត់សញ្ញាធំៗពីរ គឺការឆ្លងតាមខ្យល់ និងឆ្លងតាមដំណក់តូចៗ ដូចកាកណ្តាស់ ក្អក។
លោកបានបន្ដថា ជំងឺដែលឆ្លងតាមខ្យល់មានជំងឺ ឬមេរោគរបេង មេរោគស្អូច កញ្ជ្រឹល អុតស្វាយជាដើម។ មេរោគឆ្លងតាមខ្យល់នេះទោះបីជាពាក់ម៉ាស់យ៉ាងណាក៏មិនអាចការពារបានដែរ គឺវាអាចច្រោះចូលតាមប្រហោងតាមម៉ាស់ធំជាង ប៉ុន្តែអាចការពារបានទាល់តែពាក់ម៉ាស់របស់ពេទ្យឡទើបបានទប់ជាប់។
ចំពោះការឆ្លងតាមដំណក់ទឹកតូចៗវិញ មានន័យថា នៅពេលដំណក់ទឹកតូចៗចេញពីអ្នកជំងឺដល់កន្លែងណា មេរោគដល់ទីនោះ ជាក់ស្តែង រួមមានដូចជាជំងឺខាន់ស្លាក់ ជំងឺផ្តាសាយ និងវីរុសកូរ៉ូណា(COVID-19) ជាដើម។
លោកបន្ថែមដូច្នេះថា “ពេលដំណក់ទឹកតូចៗដល់ទីណាមេរោគទៅដល់ទីនោះ ដំណក់ទឹកនឹងកើតមកពីការក្អក កណ្តាស់។ បើតាមការសិក្សា ចំពោះកណ្តាស់ ក្អកនេះអាចមានចម្ងាយជិត១ម៉ែត្រ ហើយនៅពេលក្អកកន្លែងណា ទឹកនឹងនៅទីនោះ។ អីចឹ្ចងបានគេឱ្យពាក់ម៉ាស់ ដើម្បីចៀសវាងការឆ្លង ដែលអ្នកជំងឺគួរតែពាក់ម៉ាស់ ដើម្បីទប់ស្កាត់នៅពេលកណ្តាស់ ហើយឆ្លងទៅគេ។”
សម្រាប់អ្នកមិនមានជំងឺ មិនចាំបាច់ពាក់ម៉ាស់ទេ ប៉ុន្តែឧស្សាហ៍លាង ដៃ និងសាប៊ូ ព្រោះថាអ្នកជាឧស្សាហ៍ប៉ះពាល់ និងទីកន្លែងផ្សេងៗដែលជាហេតុនាំឱ្យមេរោគឆាប់ឆ្លងនៅពេលយកដៃទៅញីប្រមុះ មាត់ ឬភ្នែក។ ឯកឧត្ដមបានថ្លែងបញ្ជាក់ថា “អ្នកជា ឬមនុស្សដើម្បីទប់ស្កាត់ការឆ្លងជំងឺត្រូវកាត់បន្ថយការយកដៃ ប៉ះពាល់ផ្ទៃមុខជាអតិប្បរមា កាន់តែល្អ ហើយយើងបង្ហាញថ្ងៃនេះមិនសម្រាប់ជំងឺកូរ៉ូណាទេ ជំងឺផ្សេងទៀតក៏ទប់ស្កាត់ការឆ្លងដែរ។
លោក លី សូវ៉ាន់ បានពន្យល់ថា ដៃប្រៀបដូចជាវត្ថុមួយចំនួនដែលអាចឆ្លងជំងឺ ឬអាចនិយាយថា ដៃបានប៉ះពាល់ទីកន្លែងច្រើន ហើយដែលជាហេតុនាំឱ្យមេរោគឆាប់ឆ្លង។ ដៃយើងជាអ្នកចម្លង ហើយបណ្តាលឱ្យមានអាឡាក់ស៊ីកើតលើផ្ទៃមុខ ព្រោះថាដៃមានសារធាតុច្រើន។ ឯកឧត្ដមបានលើកឡើងទៀតថា ក្រសួងសុខាភិបាលមិនបានបង្ខំឱ្យមានការពាក់ម៉ាស់នោះទេ ប៉ុន្តែការពាក់ម៉ាស់គឺនៅពេលចាំបាច់ ដូចជានៅតំបន់មួយដែលមានមនុស្សច្រើន ឬសួរសុខទុក្ខអ្នកជំងឺ៕
