យោងតាមស្ថិតិឥណ្ឌូនេស៊ី (BPS) បានបង្ហាញការព្យាករថា ទិន្នផលស្រូវរបស់ប្រទេសខ្លួន អាចនឹងកើនឡើងដល់ ៣២,០៧ លានតោន នៅឆ្នាំ ២០២២ នេះ ពោលគឺកើនឡើង ២,២៩% បើធៀបនឹងចំនួន ៣១,៣៦ លានតោន ដែលសម្រេចបានកាលពីឆ្នាំ ២០២១ កន្លងទៅ។
អនុប្រធានផ្នែកស្ថិតិដែលគ្រប់គ្រងការចែកចាយ និងសេវាកម្មរបស់ BPS លោក Setianto បាននិយាយថា ទិន្នផលស្រូវ ដែលនឹងផលិតបាន ចាប់ពីខែតុលាដល់ខែធ្នូ ត្រូវបានប៉ាន់ប្រមាណថា មានចំនួន ៥,៩ លានតោន ដែលកើនឡើង ១៥,១២% ធៀបនឹងរយ:ពេលដូចគ្នា កាលពីឆ្នាំមុន ។
ទន្ទឹមនឹងនេះ ដោយផ្នែកទៅលើផលិតកម្មស្រូវ ទៅតាមបណ្តាកោះក្នុងប្រទេស បានបង្ហាញឱ្យដឹងថា កោះជ្វា បានរួមចំណែកច្រើនជាងគេ បើធៀបនឹងកោះដទៃទៀត ពោលគឺអាចផលិតស្រូវបាន ៥៦,១២% ឬស្មើនឹង ១៨ លានតោន ដែលក្នុងនោះ ៣១,០៧% នៃផលិតកម្ម គឺទទួលបានពីកោះជ្វាខាងកើត ។
ជម្រាបឱ្យដឹងផងដែរថា កាលពីដើមខែសីហា ក្រសួងកសិកម្មរបស់ប្រទេសឥណ្ឌូនេស៊ី បាននិយាយថា ខ្លួនបានបញ្ឈប់ការនាំចូលស្រូវអង្ករ ដែលអាចបរិភោគបាន ដោយសារតែមានការផ្គត់ផ្គង់គ្រប់គ្រាន់ ហើយស្រូវអង្ករផ្សេងទៀត ដែលបាននាំចូល គឺសម្រាប់ប្រើប្រាស់តែក្នុងឧស្សាហកម្មប៉ុណ្ណោះ ៕
