ប្រមុខរដ្ឋាភិបាល សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានសុំអោយអាជីវករទាំងឡាយ សូមកុំតម្លើងថ្លៃលក់ទំនិញនានានៅលើទីផ្សារ ខណៈកម្ពុជាកំពុងមានពលរដ្ឋម្នាក់កើតជម្ងឺកូវីដ១៩។
ការលើកឡើងពីប្រមុខរដ្ឋាភិបាលនៅពេលនេះ ត្រូវបានធ្វើឡើងក្នុងឱកាសអញ្ជើញសម្ពោធដាក់ឱ្យប្រើជាផ្លូវការនូវផ្លូវជាតិលេខ ៥៥ ដែលតភ្ជាប់ពីផ្លូវជាតិលេខ៥ ក្នុងទីរួមខេត្តពោធិ៍សាត់ ឆ្ពោះទៅកាន់ព្រំដែនថ្មដា ជាប់ជាមួយខេត្តត្រាត ប្រទេសថៃ និងពិធីបើកការដ្ឋានសាងសង់ផ្លូវជាតិ១០ តភ្ជាប់ពីសំឡូត ទៅខេត្តកោះកុង កាលពីព្រឹកថ្ងៃទី៩ ខែមីនា ឆ្នាំ២០២០ ។
ក្រៅពីសុំអោយអាជីវករទាំងឡាយ កុំតម្លើងថ្លៃលក់ទំនិញនានានៅលើទីផ្សារហើយនោះ សម្តេចតេជោក៏បានជំរុញអោយប្រជាពលរដ្ឋកម្ពុជាយើងប្រើប្រាស់ក្រមារជំនួសម៉ាស់ ក្នុងការបង្ការការពារជម្ងឺកូវីដ១៩។
ទន្ទឹមនឹងនេះ សម្តេចតេជោ បានសូមអោយប្រជាពលរដ្ឋត្រូវតែមានការប្រុងប្រយ័ត្នការពារខ្លួន ជាពិសេសកុមារតូចៗ ដែលពិបាកក្នុងការការពារខ្លួន។ សម្តេចតេជោបានអំពាវនាវអោយប្រជាពលរដ្ឋទាំងអស់ត្រូវមានជំនឿជឿជាក់លើខ្លួនឯង មិនត្រូវមានការភ័យខ្លាចហួសហេតុនោះទេ៕ អត្ថបទ៖ សិរីការ
