លោក ឃឹម ប៊ុនឡែន ត្រូវបានមហាសន្និបាតថ្នាក់ជាតិបោះឆ្នោត ជាប់ជាប្រធានថ្នាក់ជាតិ នៃសភាយុវពាណិជ្ជករអន្តរជាតិកម្ពុជា សម្រាប់ឆ្នាំ២០២៣ ជំនួសលោកស្រី ស្រួ ណារីយ៉ា ប្រធានសម្រាប់ឆ្នាំ២០២២។
ការបោះឆ្នោតនេះធ្វើឡើងក្នុងមហាសន្និបាតថ្នាក់ជាតិប្រចាំឆ្នាំ២០២២ សភាយុវពាណិជ្ជករអន្តរជាតិ កម្ពុជា (JCI Cambodia) កាលពីថ្ងៃទី២៩ ខែតុលា កន្លងទៅដោយមានការចូលរួមពីក្រុមប្រឹក្សាថ្នាក់ជាតិ ថ្នាក់សាខា និងសមាជិកសមាជិកា មកពី ៦សាខា ប្រមាណជាង ៩០នាក់។
នៅក្នុងឱកាសនោះ សភាយុវពាណិជ្ជករអន្តរជាតិកម្ពុជា បានបោះឆ្នោតជ្រើសក្រុមប្រឹក្សាភិបាលសម្រាប់អាណត្តិថ្មី ឆ្នាំ២០២៣ ដែលមានលោក គីម សំណាង អគ្គលេខាធិការថ្នាក់ជាតិ ឆ្នាំ២០២៣, លោកស្រី ឆេង សុភារី អគ្គបេឡាថ្នាក់ជាតិឆ្នាំ២០២៣, កញ្ញា អប់ លីគន្ធ លេខាធិការប្រឹក្សាច្បាប់ឆ្នាំ២០២៣, លោក លី ឧត្តម អនុប្រធានប្រតិបត្តិថ្នាក់ជាតិ ឆ្នាំ២០២៣, លោក សាំង តារារស្មី អនុប្រធានថ្នាក់ជាតិ ទទួលបន្ទុកកិច្ចការអភិវឌ្ឍធនធាន ឆ្នាំ២០២៣, លោក ចាន់ ពេជ្យ អនុប្រធានថ្នាក់ជាតិ ទទួលបន្ទុកកិច្ចការសហគមន៍ ឆ្នាំ២០២៣, លោក ជា កុកម៉េង អនុប្រធានថ្នាក់ជាតិ ទទួលបន្ទុកកិច្ចការពាណិជ្ជកម្ម ឆ្នាំ២០២៣, កញ្ញា លីម ហ៊ួង អនុប្រធានថ្នាក់ជាតិ ទទួលបន្ទុកកិច្ចការអន្តរជាតិ ឆ្នាំ២០២៣, កញ្ញា អ៊ុយ មួយហៃ អនុប្រធានថ្នាក់ជាតិ ទទួលបន្ទុកកិច្ចការព័ត៌មានវិទ្យា ឆ្នាំ២០២៣។
សូមជម្រាបថា សភាយុវពាណិជ្ជករអន្តរជាតិ កម្ពុជា (JCI Cambodia) មានបេសកកម្មផ្តល់ឱកាសអភិវឌ្ឍសមត្ថភាពសម្រាប់យុវជនអោយក្លាយជាអ្នកដឹកនាំឆ្នើម សម្រាប់ពិភពលោកដែលកំពុងមានការផ្លាស់ប្តូរ (Developing Leaders for a Changing World) ដើម្បីជាប្រយោជន៍សម្រាប់យុវជនខ្លួនឯងផ្ទាល់ សម្រាប់គ្រួសារ និងសង្គមជាតិទាំងមូលផងដែរ៕
