នាយករដ្ឋមន្ត្រីឥណ្ឌា Narendra Modi នឹងបើកកិច្ចប្រជុំទ្វេភាគីជាមួយថ្នាក់ដឹកនាំដល់ទៅ ៨ ប្រទេសនាថ្ងៃទី ១៦ វិច្ឆិកា អំឡុងកិច្ចប្រជុំកំពូល G20 ដែលកំពុងធ្វើឡើងនៅកោះបាលី ប្រទេសឥណ្ឌូណេស៊ី។
យោងតាមការចុះផ្សាយពី Timesofindia បានឲ្យដឹងថា ប្រទេសដែលនឹងត្រូវជួបប្រជុំជាមួយឥណ្ឌាមានដូចជា ឥណ្ឌូណេស៊ី អេស្ប៉ាញ បារាំង សិង្ហបុរី អាល្លឺម៉ង់ អ៊ីតាលី អូស្ត្រាលី និងចក្រភពអង់គ្លេស។
សម្រាប់កិច្ចប្រជុំទ្វេភាគីជាមួយអង់គ្លេស រដ្ឋាភិបាលឥណ្ឌាទទួលបានផ្លែផ្កាយ៉ាងល្អ ពោលនាយករដ្ឋមន្ត្រីអង់គ្លេស Rishi Sunak អនុញ្ញាតផ្ដល់ទិដ្ឋាការពិសេសដល់អ្នកជំនាញវ័យក្មេងមកពីប្រទេសឥណ្ឌាមកធ្វើការនៅអង់គ្លេស ប្រមាណ ៣ ០០០ នាក់ជារៀងរាល់ឆ្នាំ។
រដ្ឋាភិបាលអង់គ្លេសថែមទាំងបានលើកឡើងទៀតថា ឥណ្ឌានឹងទទួលបានផលប្រយោជន៍ធំពីគម្រោងខាងលើ ដ្បិតពួកគេជាប្រទេសទីមួយដែលទទួលបានទិដ្ឋាការពិសេសបែបនេះពីអង់គ្លេស ហើយគម្រោងនេះក៏នឹងបង្ហាញពីភាពរឹងមាំនៃភាពជាដៃគូរវាងអង់គ្លេស និងឥណ្ឌាទៀតផង៕
