តាមការប៉ាន់ស្មាន កម្ពុជាត្រូវការថវិកាសរុបប្រមាណ ៤០៦លានដុល្លារអាមេរិក ដើម្បីគាំទ្រសកម្មភាព និងសម្រេចបានគោលដៅ «កម្ពុជាគ្មានមីន» នៅត្រឹមឆ្នាំ២០២៥។ នេះបើតាមផែនការយុទ្ធសាស្ត្រជាតិសកម្មភាពមីន ២០១៨-២០២៥។
ផែនការយុទ្ធសាស្ត្រខាងលើនេះ បានឱ្យដឹងផងដែរថា ដើម្បីសម្រេចគោលបំណងបោសសម្អាតមីន និងសំណល់ជាតិផ្ទុះពីសង្គ្រាម ឱ្យអស់ត្រឹមឆ្នាំ២០២៥ កម្ពុជាត្រូវការថវិកាប្រមាណ ៣៥៤លានដុល្លារអាមេរិក សម្រាប់ធ្វើការបោសសម្អាតរំដោះផ្ទៃដី និងថវិកាប្រមាណ ០,៦លានដុល្លារអាមេរិក សម្រាប់ស្រាវជ្រាវចម្ការមីនមូលដ្ឋាន ព្រមទាំង ៥២លានដុល្លារអាមេរិកទៀត សម្រាប់ការអប់រំកាត់បន្ថយគ្រោះថ្នាក់មីន និងកិច្ចជួយសង្គ្រោះជនរងគ្រោះ ការស្វែងរកការគាំទ្រមតិ និងការគ្រប់គ្រងវិស័យសកម្មភាពមីន។
លោកទេសរដ្ឋមន្ត្រី លោក លី ធុជ អនុប្រធានទី១ អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន ក្នុងពេលបើកសន្និបាតជាតិខួប៣០ឆ្នាំនៃសកម្មភាពមីននៅកម្ពុជា កាលពីថ្ងៃទី២១ ខែវិច្ឆិកាម្សិលមិញ បានលើកឡើងថា ផ្ទៃដីប្រមាណ ២,៥៣១ គីឡូម៉ែត្រក្រឡា ត្រូវបានបោសសម្អាតរួច និងប្រែក្លាយជាដីសុវត្ថិភាពសម្រាប់ប្រជាជនប្រមាណ ៩លាននាក់ ប្រើប្រាស់ និងរាប់បញ្ចូលទាំងការសាងសង់លំនៅដ្ឋាន សាលារៀន មន្ទីរពេទ្យ ស្ពានថ្នល់ និងកសិកម្មជាដើម ជាពិសេសបានប្រែក្លាយ ដីមីន ទៅជាដីមាស។
បើតាមលោក លី ធុជ គិតត្រឹមខែតុលា ឆ្នាំ២០២២ កម្ពុជានៅសល់ផ្ទៃដីសង្ស័យមានមីន និងសំណល់ជាតិផ្ទុះពីសង្គ្រាមចំនួន ២,០០១ គីឡូម៉ែត្រក្រឡា ក្នុងនោះផ្ទៃដីមានមីនចំនួន ៧០៣គីឡូម៉ែត្រក្រឡា និងសំណល់ជាតិផ្ទុះពីសង្គ្រាមចំនួន ១,២៩៨គីឡូម៉ែត្រក្រឡា រាប់បញ្ចូលទាំងគ្រាប់បែកចង្កោមផងដែរ។
សូមជម្រាបថា ក្នុងឱកាសអញ្ជើញបិទសន្និបាតជាតិ ខួប៣០ឆ្នាំនៃសកម្មភាពមីននៅកម្ពុជា កាលពីព្រឹកមិញនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា ក្នុងជំនួបជាមួយប្រទេសអញ្ជើញចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធកន្លងទៅនេះ សម្តេចបានស្នើឱ្យមានការជួយបោសសំអាតមីននៅកម្ពុជា។ សម្តេចបន្តថា ថវិកាសប្បុរសជនប្រមាណ ១០លានដុល្លារ ត្រូវបានប្រើប្រាស់បោសសំអាតមីន នៅសល់ប្រមាណ ៨លានដុល្លារទៀត។ សម្តេចតេជោ ហ៊ុន សែន ក៏បន្តអំពាវនាវដល់សប្បុរសជន ចូលរួមឧបត្ថម្ភដល់ថវិកា សម្រាប់សកម្មភាពបោសសំអាតមីន៕
