លោកស្រី អេង លីគង់ ប្រធានបណ្តាញសហគ្រិនស្រ្តី នៅកម្ពុជា ជាសហស្ថាបនិក និងអតីតប្រធានសមាគមសហគ្រិនស្ត្រីកម្ពុជា អាណត្តិទី៣ ដែលមានទស្សនវិស័យដោះស្រាយបញ្ហាប្រឈមដែលស្ត្រីសហគ្រិនតែងតែជួបប្រទះ ដើម្បីឲ្យស្ត្រីកាន់តែអាចអភិវឌ្ឍសេដ្ឋកិច្ចរបស់ខ្លួន សហគមន៍ និងសេដ្ឋកិច្ចជាតិបានប្រសើរឡើង។
បន្ទាប់ពីបញ្ចប់ការសិក្សាផ្នែកទន្តពេទ្យ នៅឆ្នាំ១៩៩៣ លោកស្រីបានបង្កើតអាជីវកម្មព្យាបាលធ្មេញ គឺគ្លីនិកព្យាបាលធ្មេញ ម៉ាស្ទើរ ឃែរ (Master Care) ដ៏ធំមួយនៅរាជធានីភ្នំពេញ។ លោកស្រីបានឆ្លងកាត់បទពិសោធន៍ធ្វើជំនួញ និងអាជីវកម្មជាយូរឆ្នាំមកហើយ តាមរយៈការគ្រប់គ្រងគ្លីនិកព្យាបាលធ្មេញនេះ និងអាជីវកម្មផ្សេងៗទៀត។
លោកស្រី ជាអតីតដំណាងក្រុមប្រឹក្សាគណៈទន្តពេទ្យរាជធានីភ្នំពេញ នៅក្នុងឆ្នាំ២០០៦ រយៈពេល ៦ឆ្នាំ។ ក៏ធ្លាប់ធ្វើប្រធានបណ្តាញសហគ្រិនស្ត្រីអាស៑ាននៅកម្ពុជា ក្នុងឆ្នាំ២០២០។
ក្នុងអាជីពជាទន្តបណ្ឌិតដ៏ឆ្នើម និងបានដឹកនាំសហគ្រិនស្រ្តីជាច្រើនឱ្យសម្រេចគោលដៅចូលរួមក្នុងកិច្ចការសង្គម និងសេដ្ឋកិច្ច លោកស្រីក៏ទទួលបានពានរង្វាន់ សហគ្រិនស្ត្រីអាស៊ាន ឆ្នាំ២០១៧ នៅប្រទេសហ្វីលីពីន។
លោកស្រីវេជ្ជបណ្ឌិត អេង លីគង់ ជារឿយៗតែងតែលើកទឹកចិត្ដដល់ស្ដ្រីគ្រប់រូប ឲ្យក្រោកឈរឡើង ហើយដើរទៅរកអ្វីដែលខ្លួនប៉ងប្រាថ្នា ដោយបង្ហាញពិភពលោកឲ្យឃើញពីសមត្ថភាពរបស់ខ្លួន។ លោកស្រីថា សម័យថ្មី ស្ដ្រីមិនគួរយកផ្នត់គំនិតចាស់មកចាក់សោរខ្លួនឯងឲ្យដាច់ឆ្ងាយការរីកចម្រើននៃបច្ចេកវិទ្យាឡើយ៕
