ភ្នំពេញ៖ ខណៈប្រទេសកម្ពុជាកំពុងប្រយុទ្ធនឹងការរីករាលដាលនៃជំងឺរលាកផ្លូវដង្ហើមធ្ងន់ធ្ងរ (កូវីដ១៩) ដែលធ្វើឱ្យវិស័យមួយចំនួនជួបនូវវិបតិ្ត ពិសេសបង្កការរងគ្រោះដល់ប្រជាជនកម្ពុជាផងនោះ គេសង្កេតឃើញឧកញ៉ាល្បីៗ នៅកម្ពុជាជាច្រើនរូប បាននាំគ្នារួមចំណែកឧបត្ថមថវិកាដល់រដ្ឋាភិបាលកម្ពុជា ដើម្បីទប់ស្កាត់កូវីដ១៩នេះ។
បើយោងតាមលិខិតថ្លែងអំណរគុណ របស់ប្រមុខរដ្ឋាភិបាល សម្តេច ហ៊ុន សែន នាយករដ្ឋមន្រ្តីនៃកម្ពុជា នៅថ្ងៃទី២០ ខែមីនា ឆ្នាំ២០២០នេះ បានផ្ញើលិខិតថ្លែងអំណរគុណចំពោះលោកឧកញ៉ា ពុង ឃាវសែ និងលោកជំទាវ ដែលបានឧបត្ថម្ភទឹកប្រាក់ចំនួន ៥០ម៉ឺនដុល្លារអាមេរិក ដល់រាជរដ្ឋាភិបាលកម្ពុជា សម្រាប់សកម្មភាពបង្ការ និងទប់ស្កាត់ការរាតត្បាតនៃជំងឺកូវីដ១៩ ដែលកំពុងបង្កគ្រោះភ័យដល់សុខភាព និងជីវិតរបស់ប្រជាជនកម្ពុជា។
ជាមួយគ្នានេះ បើយើងងាកមក អ្នកឧកញ៉ា គិត ម៉េង និងលោកជំទាវវិញ ក៏បានឧបត្ថម្ភទឹកប្រាក់ចំនួន ៥០ម៉ឺនដុល្លារអាមេរិក ដល់រាជរដ្ឋាភិបាលកម្ពុជាផងដែរ សម្រាប់សកម្មភាពបង្ការ និងទប់ស្កាត់ការរាតត្បាតនៃជំងឺកូវីដ១៩។នេះបើយោងតាម លិខិតថ្លែងអំណរគុណ របស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា កាលថ្ងៃទី១៩ ខែមីនា ឆ្នាំ២០២០។
ដោយឡែក បើក្រឡេកកមើល ក្រុមហ៊ុន ជីបម៉ុង គ្រុប ដែលត្រូវគេដឹងថា ជាក្រុមហ៊ុន លោកឧកញ៉ា លាង ឃុន អគ្គនាយកក្រុមហ៊ុនជីបម៉ុងគ្រុប ក៏បានឧបត្ថម្ភទឹកប្រាក់ចំនួន ៥០ម៉ឺនដុល្លារអាមេរិក ដល់រាជរដ្ឋាភិបាលកម្ពុជា សម្រាប់សកម្មភាពបង្ការ និងទប់ស្កាត់ការរាតត្បាតនៃជំងឺកូវីដ១៩ ផងដែរ។ បើយោងតាម លិខិតថ្លែងអំណរគុណ របស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា កាលថ្ងៃទី១៩ ខែមីនា ឆ្នាំ២០២០។
តាមរយៈ ការរួមចំណែកជាថវិកានេះដែរ ត្រូវបានប្រមុខរដ្ឋាភិបាលកម្ពុជា សម្តេចតេជោ ហ៊ុន សែន បានបញ្ជាក់ថា «ខ្ញុំមានមោទនភាពណាស់ ដោយឃើញជនរួមជាតិយើងមានការគិតគូរយកចិត្តទុកដាក់ ជួយគ្នាទៅវិញទៅមកនៅក្នុងគ្រាអាសន្នបែបនេះ»៕ អត្ថបទ៖ សិរីកា
