កាលពីព្រឹកថ្ងៃពុធ ទី២១ ខែធ្នូ ឆ្នាំ២០២២ ម្សិលមិញនេះ លោកឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា (CRF) បានអញ្ជើញជួបពិភាក្សាជាមួយលោក ហេង សុវណ្ណារិទ្ធ អនុព័ន្ធពាណិជ្ជកម្ម ប្រចាំព្រះរាជាណាចក្រថៃឡង់ដ៌ ក្នុងគោលបំណងដើម្បីជំរុញអង្ករកម្ពុជា ចូលក្នុងផ្សារទំនើបថៃ។
លោកឧកញ៉ា ចាន់ សុឃាំង បានបញ្ជាក់ឱ្យដឹងថា ក្នុងជំនួបខាងលើនេះ លោកបានលើកឡើងនូវចំណុចសំខាន់ៗមួយចំនួនដូចជា៖ (១)ជំរុញអង្ករកម្ពុជា ចូលក្នុងផ្សារទំនើបរបស់ថៃ ដូចជាផ្សារទំនើប Big C និងផ្សារទំនើបម៉ាក្រូ (Makro), (២)ពិភាក្សាពីគម្រោងរៀបចំ Cambodia Rice Night ជាមួយកុងស៊ុល និងទូតដែលមានវត្តមាននៅប្រទេសថៃទាំងអស់ និង (៣)បង្កើតគ្រុប តេលេក្រាម CRF-Commercial Attache ដើម្បីផ្សព្វផ្សាយ និងជំរុញអង្ករកម្ពុជា។
គួររំលឹកថា តាមរយៈកម្មវិធីមហាសន្និបាតបូកសរុបការងារឆ្នាំ២០២២ និងលើកទិសដៅការងារឆ្នាំ២០២៣ និងកម្មវិធីបោះឆ្នោតក្រុមប្រឹក្សាភិបាល អាណត្តិទី៤ ដែលប្រព្រឹត្តឡើងនាថ្ងៃទី២៣ ខែវិច្ឆិកា ឆ្នាំ២០២២ នៅសណ្ឋាគារ សូហ្វីតែល ឧកញ៉ា ចាន់ សុឃាំង ទទួលនូវសេចក្តីទុកចិត្តពីសមាជិក សមាជិកា ក្រុមប្រឹក្សាភិបាលសហព័ន្ធស្រូវអង្ករកម្ពុជា ក្នុងការបោះឆ្នោតគាំទ្រឱ្យក្លាយជាប្រធានសហព័ន្ធស្រូវអង្ករកម្ពុជា សម្រាប់អាណត្តិទី៤។
ក្រោយជាប់ជាប្រធានថ្មីសហព័ន្ធស្រូវអង្ករកម្ពុជា លោកឧកញ៉ា ចាន់ សុឃាំង បានខិតខំប្រឹងប្រែងយ៉ាងខ្លាំង ដើម្បីធ្វើយ៉ាងណា ជួយជំរុញវិស័យស្រូវអង្ករកម្ពុជា ទៅកាន់ទីផ្សារអន្តរជាតិ។ ជាក់ស្តែង កាលពីថ្ងៃទី៥ ខែធ្នូ ឆ្នាំ២០២២ លោកឧកញ៉ា បានដឹកនាំក្រុមហ៊ុននាំចេញ រោងម៉ាស៊ីនកិនស្រូវ និងស្ថាប័នពាក់ព័ន្ធ ចូលរួមកិច្ចប្រជុំជាមួយលោក ហួត គីមឆា កុងស៊ុលកិត្តិយសកម្ពុជា ប្រចាំរដ្ឋកាលីហ្វ័រញ៉ា ដើម្បីជំរុញការនាំចេញអង្ករទៅកាន់ទីផ្សារសហរដ្ឋអាមេរិក។
យ៉ាងណាមិញ កាលពីថ្ងៃទី១៦ ខែធ្នូ ឆ្នាំ២០២២ លោកឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា (CRF) ក៏បានសហការជាមួយទីភ្នាក់ងារសម្របសម្រួលកិច្ចសហប្រតិបត្តិការរបស់ប្រទេសទួរគី (TIKA) ផ្តល់ជំនួយជាម៉ាស៊ីនស្ទូងស្រូវចំនួន ២០គ្រឿង និងឧបករណ៍សម្រាប់បណ្តុះគ្រាប់ពូជ ដល់សហគមន៍ចំនួន៥ ដែលមានទីតាំងនៅខេត្តកំពង់ចាម កំពង់ធំ ព្រៃវែង និងខេត្តតាកែវ ក្នុងគោលបំណងជួយលើកកម្ពស់ជីវភាពរបស់ប្រជាកសិករ៕
