លោក ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន បានលើកឡើងអំណះអំណាង ៤ចំណុចក្នុងការគូសវាសផែនការជីវិតត្រឹមត្រូវ នៅក្នុងវេទិកាជជែកពិភាក្សាពិសេសមួយ ក្រោមប្រធានបទ «ការរៀបចំផែនការ និងការអនុវត្ត ដើម្បីឈានទៅសម្រេចជោគជ័យ» នៅThe Factory Phnom Penh នាព្រឹក ថ្ងៃសុក្រ ទី២៣ ខែធ្នូនេះ។
ទាក់ទងនឹងការជជែកពិភាក្សានោះ លោកបានលើកឡើងចំណុច៤ ដើម្បីចាប់ផ្ដើមផែនការ និងតម្រង់គោលដៅជីវិតរួមមាន៖
១/ត្រូវមានក្ដីស្រម៉ៃ និងរៀបចំក្ដីសុបិនឱ្យបានច្បាស់លាស់
២/ត្រូវមានយុទ្ធសាស្ត្រមធ្យោបាយ
៣/ត្រូវមានសកម្មភាព
៤/ រាល់ដំណើរទាំងបីខាងលើ កុំភ្លេចសួរអ្នកមានបទពិសោធន៍។
ទន្ទឹមនឹងការលើកឡើងអះអាងខាងលើ លោកក៏បានសង្កត់ធ្ងន់ថា៖ «ជីវិតជាសិល្បៈដែលយើងត្រូវដាប់ឆ្លាក់ដោយខ្លួនឯង ហើយត្រូវរៀនធ្វើ រៀននិពន្ធ ព្រមទាំងរៀននិទានជីវិតឱ្យខ្លួនឯងផងដែរ»។
គួររម្លឹកបន្តិចថា លោក ហឿន សំនៀង ជាអតីតនិស្សិតដែលបញ្ចប់ការសិក្សាថ្នាក់បរិញ្ញាបត្រ និងបរិញ្ញាបត្រជាន់ខ្ពស់ មកពីសាកលវិទ្យាល័យ Havard នៅសហរដ្ឋអាមេរិក និងជាអតីតអ្នកបួសរយៈពេល ១៩ព្រះវស្សា បច្ចុប្បន្នលោកជានាយកវិទ្យាស្ថានតេជោសែន សាធារណការ និងដឹកជញ្ជូនផងដែរ៕
