ត្រឹមឆ្នាំ២០២២នេះ ក្រសួងរៀបចំដែនដីនគររូបនីយកម្ម និងសំណង់ បានប្រមូលចំណូលក្នុងវិស័យដីធ្លី និងសំណង់បានចំនួន ៣៦៧ ១៣៩៨៩៦ ០៥០រៀល ពោលជិត ៩០លានដុល្លារ ចូលក្នុងថវិកាជាតិ។
យោងតាមរបាយការណ៍របស់ក្រសួងរៀបចំដែនដី ដែលបានបង្ហាញក្នុងពិធីបិទសន្និបាតបូកសរុបលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ នៅថ្ងៃទី២៧ ធ្នូនេះ បានឱ្យដឹងថា ការប្រមូលចំណូលរបស់ក្រសួងដែនដី ក្នុងឆ្នាំ២០២២នេះ រួមមាន៖
ទី១៖ ចំណូលរបស់រដ្ឋបាលកណ្តាលចំនួន ៨ ៣៦៨ ០៩១ ៦៤០រៀល ក្នុងនោះមាន សេវាសំណង់ទូទៅចំនួន ៧ ១៨០ ៣១០ ៤០០រៀល, សេវាសំណង់លើសសន្ទស្សន៍ ១ ១៦៦ ០០០ ០០០រៀល, សេវាព័ត៌មានសុរិយោដីតាមប្រព័ន្ធអេឡិចត្រូនិកចំនួន ១០ ៤៩៩ ២០០រៀល និងចំណូលជួលអចលនវត្ថុចំនួន ១១ ២៨២ ០៤៤រៀល។
ទី២៖ ចំណូលរបស់មន្ទីររៀបចំដែនដី តាមបណ្តារាជធានីខេត្តចំនួន ៣៥៨ ៧៧១ ៨០៤ ៤១០រៀល ក្នុងនោះមាន៖ សេវាសុរិយោដី ចំនួន ៧១ ៨២៨ ៣៦០ ១១០ រៀល, សេវាសំណង់ទូទៅ ចំនួន ៤៦ ៤៤២ ៨៦៥ ១០០រៀល និង ពន្ធប្រថាប់ត្រាចំនួន ២៤១ ០០០ ៥៧៩ ២០០រៀល។
សូមបញ្ជាក់ផងដែរថា ការប្រមូលចំណូលពីវិស័យដីធ្លី និងសំណង់ ក្នុងឆ្នាំ២០២២នេះមានការថយ ចុះប្រមាណ ២២.២៦ភាគរយ បើធៀបនឹងឆ្នាំ២០២១៕
