ក្រុមហ៊ុនផលិតរថយន្តអគ្គិសនី BYD កំពុងមានទីផ្សារខ្លាំងទាំងនៅក្នុងប្រទេសចិន និងទូទាំងសកលលោក ហើយវាក៏ជាដៃគូប្រកួតប្រជែងធំបំផុតមួយរបស់ក្រុមហ៊ុន Tesla ដែលបើកទំព័រសករាជថ្មីសម្រាប់វិស័យរថយន្តអគ្គិសនីផងដែរ។
ថ្មីៗនេះ ក្រុមហ៊ុនបានបញ្ចេញរបាយការណ៍លក់ប្រចាំខែធ្នូរបស់ពួកគេ ដោយសមិទ្ធផលចុងឆ្នាំមុនគឺធ្វើបានល្អឥតខ្ចោះ ពោលអត្រាការលក់គឺកើនឡើងលើសឆ្នាំមុនទ្វេដងឯណោះ ដោយលក់រថយន្តបាន ២៣៥ ១៩៧ គ្រឿង ខណៈកាលពីខែធ្នូ ២០២១ លក់បាន ៩៣ ៩៤៥ គ្រឿង។ នេះបើតាមការចុះផ្សាយដោយ Forbes។
គួររំលឹកដែរថា កាលពីឆ្នាំទៅ BYD ចាប់ផ្ដើមបោះជំហានចូលទីផ្សារអឺរ៉ុប ជប៉ុន និងប្រទេសផ្សេងទៀត ដែលជួយឲ្យការធ្វើពាណិជ្ជកម្មរបស់ពួកគេកាន់តែរីកមាឌធំ ហើយស្ថិតិលក់សរុបប្រចាំឆ្នាំ ២០២២ កើនឡើង ៣ ដងឯណោះ ដោយលក់រថយន្តបាន ១,៨ លានគ្រឿង។
សូមជម្រាបបន្ថែមថា ដោយសារ BYD ជាក្រុមហ៊ុនពាណិជ្ជកម្មសាធារណៈ ដូច្នេះក្រុមហ៊ុនដទៃអាចមានសិទ្ធទិញភាគហ៊ុនពី BYD ក្នុងលក្ខខណ្ឌណាមួយ ហើយអតិថិជនធំៗរបស់ក្រុមហ៊ុនចិននេះមានដូចជា Berkshire Hathaway, Dell, Apple, Xiaomi និង Huawei៕
