រយៈពេល ៣ ឆ្នាំដែលរដ្ឋាភិបាលចិន បានប្រកាសអនុម័តយុទ្ធនាការកូវីដសូន្យ ដោយធ្វើការបិទច្រកព្រំដែន ជាមួយនឹងវិធានការរឹតបន្តឹងកូវីដយ៉ាងហ្មត់ចត់ជាទីបំផុត។
យ៉ាងណា ថ្មីៗនេះពួកគេបានប្រកាសថា នឹងបើកទ្វារច្រកព្រំដែនសារថ្មីចាប់ពីថ្ងៃអាទិត្យកន្លងទៅ ហើយសម្រាប់ភ្ញៀវទេសចរណ៍ក៏មិនតម្រូវឲ្យធ្វើចត្តាឡីស័កឡើយ បើសិនជាពួកគេមិនមានសញ្ញាវិជ្ជមានកូវីដ ១៩ រយៈពេល ៤៨ម៉ោង មុនធ្វើដំណើរដល់ប្រទេសចិន។
សេចក្ដីប្រកាសអំពីការបើកច្រកព្រំដែននេះផងដែរ បានធ្វើឲ្យប្រជាជនចិនរស់នៅបរទេសជាច្រើនពាន់នាក់បង្ហាញភាពរីករាយ ដ្បិតពួកគេអាចធ្វើដំណើរមកជួបជុំក្រុមគ្រួសារនៅស្រុកកំណើតវិញ ក្នុងឱកាសបុណ្យចូលឆ្នាំចិនខាងមុខ បន្ទាប់ពីខកខានជួបជុំសាច់ញាតិអស់រយៈពេល ៣ ឆ្នាំ។
បន្ថែមពីនោះ Japantimes បានអះអាងថា ការបើកច្រកព្រំដែនរបស់ចិនសារនេះ ប្រៀបដូចជាសញ្ញានៃការបិទបញ្ចប់យុទ្ធនាការកូវីដសូន្យ ដែលកន្លងមកវាបានធ្វើឲ្យមហាអំណាចសេដ្ឋកិច្ចទី ២ លើលោក ជួបហានិភ័យជាច្រើនលើកច្រើនសារ រយៈពេល ៣ ឆ្នាំកន្លងមកនេះ។
សូមជម្រាបដែរថា ចិនគឺជាប្រទេសចុងក្រោយដែលបន្ធូរបន្ថយវិធានការកូវីដ សម្រាប់ភ្ញៀវទេសចរណ៍អន្តរជាតិដែលធ្វើដំណើរកម្សាន្តចូលមកប្រទេសរបស់ខ្លួន ហើយភ្ញៀវទេសចរណ៍ដែលមានបំណងទៅកម្សាន្តនៅចិន ត្រូវមានឯកសារបញ្ជាក់ពីការធ្វើតេស្ត PCR និងតម្រូវឲ្យពាក់ម៉ាសស្ទើរគ្រប់ពេល៕
