ឧកញ៉ា ព្រាប សុវត្ថិ កំពូលតារាចម្រៀងកម្ពុជា របស់ផលិតកម្ម ហ្គាឡាក់ស៊ីណាវ៉ាត្រា (Galaxy Navatra) កាលពីថ្ងៃទី០២ ខែកុម្ភៈ ឆ្នាំ២០២៣ បានបង្ហោះវីដេអូឃ្លីបមួយ ដែលបង្ហាញពីសកម្មភាពរបស់លោក និងក្រុមគ្រួសារ បានធ្វើដំណើរទៅ Surprise អ្នកគាំទ្រម្នាក់ ប៉ុន្តែបែរជាមានអ្នកគាំទ្ររបស់លោកជាច្រើនរង់ចាំជួបនៅទីនោះដែរ ធ្វើឱ្យលោកមានការភ្ញាក់ផ្អើលយ៉ាងខ្លាំងវិញ។
កំពូលតារាចម្រៀងកម្ពុជា រយៈពេលជាង៣ទសវត្សរ៍ បានឱ្យដឹងថា បុរសម្នាក់នោះជាអ្នកគាំទ្ររបស់លោកជាង ២០ឆ្នាំមកហើយ តែមិនដែលបានជួបគ្នា ទើបលោកឧកញ៉ាមក Surprise ម្តង ប៉ុន្តែលោកមិននឹកស្មានថា មានអ្នកគាំទ្ររបស់លោកជិតពេញភូមិក៏មកចូលរួមដែរ ធ្វើឱ្យលោក Surprise វិញ។ លោកឧកញ៉ា ក៏សូមអរគុណដល់បងប្អូនសម្រាប់ក្តីស្រឡាញ់ ដែលធ្វើឱ្យលោកឧកញ៉ាមិនអាចបំភ្លេចបាន។
សូមជម្រាបជូនថា ឧកញ៉ា ព្រាប សុវត្ថិ បានចេញប្រឡូកក្នុងអាជីពជាអ្នកចម្រៀងតាំងពីទសវត្សរ៍ឆ្នាំ១៩៩០ជាង ក្នុងនោះលោកបានច្រៀងចម្រៀងរាប់រយបទមកទល់បច្ចុប្បន្ន ដែលធ្វើឱ្យមានអ្នកគាំទ្ររបស់លោកគ្រប់ស្រទាប់វណ្ណៈ និងគ្រប់វ័យ។ ជាពិសេស បទចម្រៀងមនោសញ្ចេតនារបស់លោក បានធ្វើឱ្យដក់ជាប់ក្នុងក្រអៅបេះដូងរបស់ស្រទាប់យុវវ័យគ្រប់ជំនាន់។
តារាចម្រៀងជើងចាស់ ព្រាប សុវត្ថិ ដែលទទួលបានគោរមងារ «ឧកញ៉ា» កាលពីថ្ងៃទី ២៩ ខែមេសា ឆ្នាំ២០២២ បានមកចូលរួមជាមួយផលិតកម្ម ហ្គាឡាក់ស៊ីណាវ៉ាត្រា កាលពីថ្ងៃទី២៥ ខែសីហា ឆ្នាំ២០២០ ហើយមកទល់បច្ចុប្បន្ននេះ លោកឧកញ៉ាបានបញ្ចេញសំនៀងជាង ៥០បទហើយ នៅផលិតកម្មថ្មី ហ្គាឡាក់ស៊ីណាវ៉ាត្រា និងសុទ្ធសឹងតែជាបទល្បីៗ ធ្វើឱ្យលោកឧកញ៉ាទទួលបានការគាំទ្រកាន់តែច្រើនឡើង មួយកម្រិតថែមទៀត៕
សូមទស្សនាវីដេអូខាងក្រោម៖
