កាលពីពេលថ្មីនេះ សារព័ត៌មាន RT បានរាយការណ៍ថា រដ្ឋមន្ត្រីការបរទេសអាមេរិក Antony Blinken បានពន្យារពេលធ្វើដំណើរទស្សនកិច្ចទៅកាន់ប្រទេសចិន បន្ទាប់ពីប្រទះឃើញបាឡុងចិនហោះនៅក្នុងដែនអាកាសអាមេរិក។
រដ្ឋាភិបាលអាមេរិកអះអាងថា បាឡុងដែលប្រទះឃើញនៅដែនអាកាសរបស់ខ្លួន ជាឧបករណ៍ស៊ើបអង្កេត ប៉ុន្តែរដ្ឋាភិបាលចិនអះអាងថា វាគ្រាន់តែជាបាឡុងបង្ហោះលើដែនអាកាស ក្នុងគោលបំណងសិក្សាពីបម្រែបម្រួលអាកាសធាតុតែប៉ុណ្ណោះ។
ទន្ទឹមនឹងនោះ លោក Blinken បានបង្ហើបថា លោកបានតេទូរស័ព្ទទៅកាន់រដ្ឋមន្ត្រីជាន់ខ្ពស់ Wang Yi ដើម្បីផ្ដល់ដំណឹងពីការពន្យារពេលធ្វើដំណើរទស្សនកិច្ចមួយនោះ ប៉ុន្តែចំពោះដំណឹងទស្សនកិច្ចមួយនេះ មិនត្រូវបានបង្ហើបឲ្យដឹងមុនជាសាធារណៈដោយភាគីទាំងសងខាងនោះឡើយ។
សូមជម្រាបដែរថា ក្រសួងការបរទេសចិន បាននិយាយនៅក្នុងសេចក្តីថ្លែងការណ៍មួយកាលពីថ្ងៃសៅរ៍ថា តួនាទីរបស់អ្នកការទូតចិន និងអាមេរិកគឺ “គ្រប់គ្រងទំនាក់ទំនងទ្វេភាគីឱ្យបានត្រឹមត្រូវ ជាពិសេសគ្រប់គ្រងស្ថានការណ៍ដែលមិននឹកស្មានដល់មួយចំនួន ក្នុងលក្ខណៈត្រជាក់ និងប្រុងប្រយ័ត្ន”៕
