លោកឧកញ៉ា ម៉េន កានី អគ្គនាយកក្រុមហ៊ុន GM TRADING CO.LTD និងជាស្ថាបនិកគម្រោង បុរី GM ផ្លូវ ៥១ បានបង្កើតពាក្យស្លោកមួយ ដើម្បីជាការដាស់តឿនដល់ខ្លួនឯង តាំងពីរូបលោកនៅវ័យសិក្សា ដែលពាក្យស្លោកដ៏មានអត្ថន័យនោះគឺ “មកពីស្រុកកំណើត ទៅវិញឱ្យមានកំណើត”។
ការរំឭកពីពាក្យស្លោកខាងលើនេះ គឺក្នុងឱកាសដែលលោកឧកញ៉ា ចុះជួបសំណេះសំណាលជាមួយសិស្សានុសិស្សជាច្រើននៅសាលាមួយ ដែលលោកឧកញ៉ា ធ្លាប់បានសិក្សាកាលនៅពីក្មេង។ កាលពីកុមារភាព អំឡុងឆ្នាំ ១៩៩០ជាង លោកឧកញ៉ា ម៉េន កានី បានសិក្សាថ្នាក់បឋម នៅសាលាបឹងប្រីយ៍ ក្នុងឃុំពន្សាំង ស្រុកអង្គស្នួល ខេត្តកណ្ដាល ខណៈដែលបច្ចុប្បន្ន កាត់ទៅជាសង្កាត់ពន្សាំង ខណ្ឌព្រែកព្នៅ រាជធានីភ្នំពេញ។
លោកឧកញ៉ា បង្ហើបឱ្យដឹងថា កាលគ្រានោះ គ្រួសារលោកពិតជាមានជីវភាពក្រលំបាកណាស់ សូម្បីតែកង់ក៏គ្មានជិះដែរ។ ជារៀងរាល់ថ្ងៃ កុមារា ម៉េន កានី ត្រូវដើរទៅរៀននៅសាលាបឋមខាងលើ ទាំងទៅទាំងមក ចម្ងាយជិត ៨គីឡូម៉ែត្រ។
យ៉ាងណាមិញ ក្រោយជោគជ័យក្នុងមុខជំនួញ និងមានគោរមងារដល់ «ឧកញ៉ា» លោកឧកញ៉ា ម៉េន កានី ក៏តែងតែគោរពដឹងគុណ ចេះតបស្នងគុណដល់មនុស្ស លោកគ្រូ អ្នកគ្រូ និងទីកន្លែងណា ដែលធ្លាប់ជាថ្នាលបណ្ដុះបណ្ដាលខ្លួន តាំងពីចំណុចចាប់ផ្ដើមដំបូងបំផុត។ ជាក់ស្តែង កាលពីខែមិថុនា ឆ្នាំ២០២២ លោកឧកញ៉ា បានសាងសង់ផ្លូវប៉េតុងក្នុងសាលាមួយខ្សែ ជាការសម្ដែងការដឹងគុណ ជូនលោកគ្រូអ្នកគ្រូ និងសាលាបឋមសិក្សាបឹងប្រីយ៍ ដែលជាគ្រឹះស្ថានអប់រំទី១ ផ្ដល់ចំណេះដឹងដល់លោកឧកញ៉ា កាលពីកុមារភាព៕
