កាលពីចុងឆ្នាំ ២០២២ តំណែងជាមហាសេដ្ឋីមានបំផុតលើលោកត្រូវបានរបូតពីមេធំ Tesla លោក Elon Musk ដោយមានមហាសេដ្ឋីបារាំង Bernard Arnault ចូលមកជំនួសវិញ។
យ៉ាងណា ២ ខែតំបូងនៃឆ្នាំថ្មី ស្ថានភាពក្រុមហ៊ុន Tesla ហាក់មានភាពវិជ្ជមានគ្រាន់បើ ពោលតម្លៃហ៊ុនរបស់ពួកគេកើនឡើង ៧៦% បើធៀបនឹងរយៈពេលដូចគ្នាកាលពីឆ្នាំទៅ និងបានធ្វើឲ្យទ្រព្យសម្បត្តិមហាសេដ្ឋីអាមេរិកកើនឡើងខ្លាំង។
យោងតាមការចុះផ្សាយពី Bloomberg Billionaires Index បានបង្ហាញថា គិតត្រឹមថ្ងៃទី ១៤ កុម្ភៈ ២០២៣ Elon Musk មានទ្រព្យសម្បត្តិសរុប ១៨៧ ពាន់លានដុល្លារ ខណៈអ្នកមានដាច់គេលើលោកមានទ្រព្យសម្បត្តិ ១៩០ ពាន់លានដុល្លារ។
គួរជម្រាបដែរថា មេធំ Tesla អាចដណ្ដើមតំណែងជាមហាសេដ្ឋីមានបំផុតលើលោក ពីស្ដេចត្រាញ់បារាំងវិញបាន បើសិនជាស្ថានភាពក្រុមហ៊ុននៅតែបន្តបង្ហាញសញ្ញាវិជ្ជមានបែបនេះ៕
