លោក David Malpass ប្រធានធនាគារពិភពលោកបានប្រកាសថា នឹងចុះចេញពីតំណែងមួយនេះមួយឆ្នាំមុនអាណត្តិរបស់លោកត្រូវបញ្ចប់។ នេះបើតាមការចុះផ្សាយពី CNN។
លោក Malpass នឹងចុះចេញពីមុខតំណែងនៅថ្ងៃទី ៣០ មិថុនាដែលជាចុងបញ្ចប់នៃឆ្នាំសារពើពន្ធរបស់ធនាគារពិភពលោក បន្ទាប់ពីកាន់តំណែងជាប្រធានធនាគារពិភពលោកអស់រយៈពេលច្រើនជាង ៤ឆ្នាំ។
លោក Malpass បាននិយាយនៅក្នុងសេចក្តីថ្លែងការណ៍មួយថា៖ “វាគឺជាកិត្តិយស និងឯកសិទ្ធិដ៏ធំសម្បើម ក្នុងការបម្រើការជាប្រធាននៃស្ថាប័នអភិវឌ្ឍន៍ឈានមុខគេរបស់ពិភពលោក”។
សូមជម្រាបដែរថា ធនាគារពិភពលោក គឺជាបណ្ដុំនៃប្រទេស ១៨៧ ដែលផ្ដល់ប្រាក់កម្ចីដល់ប្រទេសកំពុងអភិវឌ្ឍ ដើម្បីកាត់បន្ថយភាពក្រីក្រ ហើយក្នុងនាមសហរដ្ឋអាមេរិកជាម្ចាស់ភាគហ៊ុនធំបំផុត ពួកគេមានសិទ្ធក្នុងការជ្រើសតាំងបុគ្គលណាម្នាក់ជាប្រធាននៃស្ថាប័នមួយនេះ។
តួយ៉ាង កាលពីឆ្នាំ ២០១៩ អតីតប្រធានាធិបតី ដូណាល់ ត្រាំ បានតែងតាំង David Malpass ជាប្រធានធនាគារពិភពលោក រយៈពេល ៥ ឆ្នាំ ប៉ុន្តែក្នុងអាណត្តិរបស់លោកមានបញ្ហាផ្ទួនៗ។
ក្នុងអំឡុងពេលកាន់តំណែងរបស់ Malpass អង្គការបានឆ្លើយតបទៅនឹងវិបត្តិជាច្រើន រួមទាំងជំងឺរាតត្បាតសកល និងសង្រ្គាមរបស់រុស្ស៊ីនៅអ៊ុយក្រែន ហើយធនាគារពិភពលោកបាននិយាយថា Malpass បានអនុវត្តការកើនឡើងនូវកំណត់ត្រាហិរញ្ញវត្ថុក្នុងការឆ្លើយតបទៅនឹងវិបត្តិទាំងពីរ។
បន្ថែមពីនោះ លោកក៏បានផ្តោតលើគោលនយោបាយដើម្បីបង្កើនកំណើនសេដ្ឋកិច្ច កាត់បន្ថយបន្ទុកបំណុលរបស់រដ្ឋាភិបាល និងជួយកាត់បន្ថយភាពក្រីក្រ ប៉ុន្តែអាណត្តិរបស់គាត់មានភាពចម្រូងចម្រាស។
កាលពីខែកញ្ញាកន្លងទៅ Malpass ទទួលបានការរិះគន់យ៉ាងខ្លាំងពីសកម្មជនអាកាសធាតុ បន្ទាប់ពីលោកបដិសេធមិនព្រមបញ្ជាក់ពីមតិផ្ទាល់ខ្លួន ជុំវិញអំណះអំណាងអ្នកវិទ្យាសាស្ត្រថា ការដុតប្រេងហ្វូស៊ីល គឺជះឥទ្ធិពលគ្រោះថ្នាក់ដល់ពិភពលោក។
ហើយបន្ទាប់ពីទទួលបានការរិះគន់យ៉ាងសំបើម អ្នកប្រឆាំងជាច្រើនបានចេញមុខធ្វើបាតុកម្មទាមទារឲ្យប្រធានធនាគារពិភពលោក លាលែងពីតំណែងរបស់ខ្លួន។
ជុំវិញការលាលែងតំណែងនេះផងដែរ មិនមានហេតុផលបញ្ជាក់ច្បាស់លាស់ឡើយ ប៉ុន្តែលោក Malpass បានបញ្ជាក់ថា លោកសម្រេចជ្រើសយកការប្រកួតប្រជែងថ្មី ហើយពេលវេលានេះគឺសក្ដិសមបំផុតសម្រាប់ការផ្លាស់ប្តូរភាពជាអ្នកដឹកនាំដោយរលូននៅ Bank Group៕
