ឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា បានបង្ហាញការយល់ឃើញជាវិជ្ជមាន ចំពោះការបង្កើតប៉ូលសេដ្ឋកិច្ចទី៤ លើគម្រោងមច្ឆា និងអង្ករ នៅខេត្តចំនួន៤គឺ ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ និងខេត្តប៉ៃលិន។
នាព្រឹកថ្ងៃទី១៤ ខែមីនានេះ ក្នុងឱកាសចុះត្រួតពិនិត្យការដ្ឋានសាងសង់ទំនប់វារីអគ្គិសនីស្ទឹងពោធិ៍សាត់១ ស្ថិតក្នុងភូមិស្ទឹងថ្មី ឃុំប្រមោយ ស្រុកវាលវែង សម្ដេចតេជោ ហ៊ុន សែន បានថ្លែងថា «កម្ពុជានឹងមានប៉ូលសេដ្ឋកិច្ចទី៤ ដែលមាន៤ខេត្ត គឺខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ និងខេត្តប៉ៃលិន»។ សម្តេចតេជោ បានបញ្ជាក់ថា គម្រោងប៉ូលសេដ្ឋកិច្ចទី៤នេះ ស្ថិតក្រោមគំនិតផ្តួចផ្តើមរបស់សម្តេច និងលោកប្រធានាធិបតីចិន ស៊ី ជីនពីង ដោយផ្តោតលើគម្រោងមច្ឆា និងអង្ករ ដោយសារខេត្តទាំង៤នេះសម្បូរទៅដោយស្រូវ និងត្រី។
ចំពោះគម្រោងខាងលើនេះ លោកឧកញ៉ា ចាន់ សុឃាំង បានថ្លែងប្រាប់ដល់ឧកញ៉ា ញូស៍ ឱ្យដឹងថា គម្រោងប៉ូលសេដ្ឋកិច្ចទី៤ ដោយផ្តោតលើគម្រោងមច្ឆា និងអង្ករ ដែលសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសបង្កើតឡើងនេះ គឺជារឿងមួយល្អ ព្រោះជាយុទ្ធសាស្ត្រមួយ កាលណាយើងដាក់វាជាតំបន់មួយច្បាស់លាស់បែបនេះ នោះនឹងងាយស្រួលក្នុងការតម្រង់គោលដៅ ហើយណាមួយខេត្តទាំង៤នេះ ជាខេត្តដែលមានសក្តានុពលផលិតស្រូវបានច្រើនខ្លាំង។
គួរបញ្ជាក់ថា បើតាមសម្តេចតេជោ ខេត្តទាំង៤នេះ ក៏ត្រូវបង្កើនផលិតផលផ្សេងៗទៀតផងដែរ ដើម្បីចូលរួមជាមួយទីផ្សារតំបន់ និងពិភពលោក។ យ៉ាងណាមិញ នៅក្នុងវេទិកាជំរុញពាណិជ្ជកម្មវិនិយោគនិងទេសចរណ៍កម្ពុជា-ចិន កាលថ្ងៃទី១០ខែកុម្ភៈ ឆ្នាំ២០២៣ នៅទីក្រុងប៉េកាំង ប្រទេសចិន សម្តេចតេជោ ហ៊ុន សែន បានធ្វើការណែនាំឲ្យវិនិយោគិនចិនចាប់យកឱកាសបណ្តាក់ទុននៅភូមិភាគពាយព្យប្រទេសកម្ពុជា ដែលនឹងត្រូវកំណត់ជាប៉ូលសេដ្ឋកិច្ចទី៤ របស់ប្រទេសដែលគ្របដណ្តប់ លើខេត្តចំនួន៤នេះផងដែរ៕
