តារាចម្រៀង ខេម ដែលជ្រកក្រោមទ្រនំផលិតកម្មកម្សាន្ត ហ្គាឡាក់ស៊ី ណាវ៉ាត្រា របស់ឧកញ៉ាវ័យក្មេងចិត្តធម៌ ឡេង ណាវ៉ាត្រា បានប្រកាសចូលរួមបរិច្ចាគថវិកា ១០លានរៀល ជូនសម្តេចតេជោ ហ៊ុន សែន។
ខេម បានសរសេរលើហ្វេសបុកថា ក្នុងនាមខ្ញុំបាទជាតារាចម្រៀង( Galaxy navatra) ដែលចេញពីការគាំទ្ររបស់ពុកម៉ែបងប្អូនទាំងអស់គ្នា សូមផ្ដល់នូវការ បរិច្ចាកថវិកាជូនចំពោះសម្ដេចតេជោចំនួន ១០ លានរៀលដើម្បីជាការចូលរួមចំណែក ទិញ
វ៉ាក់សាំងជួយទៅដល់សង្គម ចំពោះពុកម៉ែបងប្អូនដែលងាយនិង រងគ្រោះដោយជំងឺកូវីដ19 សូមគោរពជូនពុកម៉ែបងប្អូនឲ្យមានសំណាងល្អ ឆ្លងផុតពីជំងឺដ៏កាចអាក្រក់មួយណា។
ចំណែកតារាចម្រៀងស្រីវ័យក្មេងដ៍ល្បីដែលឆក់យកចិត្តអ្នកគាំទ្របាននាពេលបច្ចុប្បន្នេះ តន់ ចន្ទសីម៉ា ជាតារាស្រីជួរមុខផលិតកម្ម ហ្គាឡាក់ស៊ី នាងបានចូលរួមបរិច្ចាគថវិកា ១០លានរៀល ជូនដល់ប្រមុខរាជរដ្ឋាភិបាលកម្ពុជា ដើម្បីទិញវ៉ាក់សាំងកូវីដ១៩។ ចន្ទសីម៉ា បានសេរសរលើបណ្តាញសង្គមថា នាងខ្ញុំ តន់ ចន្ទសីម៉ា ពិតជាសប្បាយចិត្តនៅពេលបានដឹងពីការប្រកាស របស់ សម្តេចតេជោ ហ៊ុន សែន ក្នុងការទិញវ៉ាក់សាំងជូនប្រជាជនកម្ពុជា នាងខ្ញុំសូមគោរពផ្តល់ជូននូវ ថវិកា ១០លានរៀល តាមដែលនាងខ្ញុំមានលទ្ធភាពធ្វើបាន ដើម្បីចូលរួមចំណែកក្នុងការទិញវ៉ាក់សាំងជួយដល់បងប្អូនប្រជាជនកម្ពុជា សូមគោរពជូនពរពុកម៉ែបងប្អូន ទទួលបាន សំណាងល្អ សុខសុវត្ថិភាព ទាំងអស់គ្នា។
ការប្រកាសរបស់ ខេម និង តន់ ចន្ទសីម៉ា បានធ្វើឡើងភ្លាមៗ បន្ទាប់ពីសម្តេចតេជោ ហ៊ុន សែន ប្រកាសពីការត្រៀមថវិកាទិញវ៉ាក់សាំងកូវីដ១៩ មកចាក់ជូនប្រជាពលរដ្ឋដោយឥតគិតថ្លៃ។
នៅល្ងាចថ្ងៃទី០៧ ខែធ្នូ ឆ្នាំ២០២០ សម្តេចតេជោ ហ៊ុន សែន បានប្រកាសពីការត្រៀមបម្រុងថវិកាសម្រាប់ទិញវ៉ាក់សាំងយកមកចាក់ជូនប្រជាជនដោយឥតគិតថ្លៃជាជំហានដំបូងចំនួន ១លានដូស ដើម្បីចាក់ប្រជាពលរដ្ឋប្រមាណ ៥០ម៉ឺននាក់។
សូមបញ្ជាក់ថា គិតមកដល់ពេលនេះ ថវិកាដែលសប្បុរសជនចូលរួមរហូតពេលនេះ មានជាង១៨លានដុល្លារអាមេរិក។
