វិស័យអចលនទ្រព្យ ដែលជាវិស័យស្នូលសម្រាប់ទ្រទ្រង់កំណើនសេដ្ឋកិច្ចកម្ពុជា ត្រូវបានព្យាករថា នឹងបន្តកំណើនក្នុងរយៈពេល ៥ ឆ្នាំទៅមុខទៀត។ ជាក់ស្តែង កាលពីថ្ងៃទី១៨ ខែកុម្ភះ ឆ្នាំ២០២១ ដី២២ ហិកតាជាង ត្រូវបានក្រសួងរៀបចំដែនដី នគរូបនីយកម្ម និងសំណង់ ធ្វើការចុះពិនិត្យដើមរៀបចំជាគម្រោងលំនៅឋានតម្លៃសមរម្យដ៏ធំមួយ នៅសង្កាត់ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង។
អគ្គនាយកនៃអគ្គនាយកដ្ឋានលំនៅឋាន ឯកឧត្ដម បេងហុង សុជាតិ ខេមរ៉ូ បានដឹកនាំក្រុមការងារចុះពិនិត្យផ្ទាល់ទីតាំងស្នើសុំរៀបចំអភិវឌ្ឍគម្រោងលំនៅឋានតម្លៃសមរម្យ ដែលមកទល់បច្ចុប្បន្នគម្រោងនេះកំពុងស្ថិតក្នុងដំណាក់កាល ពិនិត្យស្ថានភាពទូទៅភូមិសាស្ត្រដីស្នើសុំអភិវឌ្ឍ ពិនិត្យលើផ្នែកហេដ្ឋារចនាសម្ព័ន្ធជុំវិញដី ពិនិត្យលើសេវាសាធារណៈដែលបានតភ្ជាប់ជុំវិញ ពិនិត្យលើឯកសារគតិយុត្ត និងទិដ្ឋភាពផ្លូវច្បាប់ផ្សេងៗ និងពិនិត្យលើសក្តានុពលជុំវិញទីតាំងដីដែលស្នើសុំអភិវឌ្ឍលំនៅឋានតម្លៃសមរម្យ។
គម្រោងមួយនេះ ត្រូវបានគេរំពឹងថា ការអភិវឌ្ឍលំនៅឋានដែលមានតំលៃសមរម្យ និងការិយាល័យពាណិជ្ជកម្មសម្រាប់ជួល នឹងក្លាយជាការចាប់អារម្មណ៍សម្រាប់ឆ្នាំ ២០២១នេះ។
បើយោងតាមរបាយការណ៍បច្ចុប្បន្នភាពទីផ្សារអចលនទ្រព្យឆ្នាំ ២០១៩ របស់ CBRE បានបង្ហាញថា ទីផ្សារអចលនទ្រព្យនៅកម្ពុជា នៅតែបន្តមានសុខភាពល្អ ទោះបីជាមានការប្រឈមនឹងហានិភ័យខ្លះៗក៏ដោយ។ របាយការណ៍នេះបានវាយតម្លៃថា ការរក្សាបានកំណើននេះ ដោយសារតែទីផ្សារអចលនទ្រព្យនៅកម្ពុជា ហាក់ដូចជា មានភាពចាស់ទុំ និងភាពធន់ជាងមុន៕
