ចិនបានពិនិត្យឃើញនូវចំណុចខ្វះចន្លោះ ដែលតម្រូវឱ្យកែលម្អមុននាំផ្លែស្វាយស្រស់ចូលប្រទេស

សង្គម​និង​សេដ្ឋកិច្ច
299 Shares

ក្រុមការងារអគ្គនាយកដ្ឋានកសិកម្ម បានត្រួតពិនិត្យចម្ការស្វាយ និងរោងចក្រប្រព្រឹត្តកម្មពងរុយក្នុងផ្លែស្វាយ តាមអនឡាញជាមួយភាគីគយនៃខេត្តក្វាងស៊ី តំណាង អគ្គរដ្ឋបាលគយនៃសាធារណរដ្ឋប្រជាមានិតចិន នៅលើទីតាំងដែលបានគ្រោងទុក នៅថ្ងៃទី១០ ខែមីនា ឆ្នាំ២០២១។ បើយោងតាមទំព័រហ្វេសបុកលោករដ្ឋមន្ត្រីកសិកម្ម វែង សាខុន ចេញផ្សាយនៅព្រឹកនេះ។

ទីតាំងដែលគ្រោងទុកនោះរួមមាន៖
១-ចម្ការស្វាយ UCDL Development Co.,Ltd
២- ចម្ការស្វាយ Angkor Harvest Co.,Ltd
៣-ចម្ការស្វាយ Bamin Agriculture Hi-Tech Development Co.,Ltd
៤-រោងចក្រប្រព្រឹត្តកម្មពងរុយចោះផ្លែស្វាយ Long Wo Agriculture (Cambodia) Co.,Ltd
៥-រោងចក្រប្រព្រឹត្តកម្មពងរុយចោះផ្លែស្វាយ AL JAZEELAND FOOD PTE. LTD
៦-រោងចក្រប្រព្រឹត្តកម្មពងរុយចោះផ្លែស្វាយ BOEUNG KET FRESH FRUITS Co.,Ltd
៧-រោងចក្រប្រព្រឹត្តកម្មពងរុយចោះផ្លែស្វាយ HYUNDAI AGRO (CAMBODIA) CO.,Ltd

May be an image of one or more people and people standing

តាមរយៈការវាយតម្លៃរយៈពេលពេញមួយថ្ងៃ ភាគីចិនបានសន្និដ្ឋានដូចខាងក្រោម៖
១. ពិនិត្យឃើញថាទាំងចម្ការស្វាយនិងរោងចក្រប្រព្រឹត្តកម្មពងរុយក្នុងផ្លែស្វាយ មានចំណុចល្អ ប្រសើរច្រើន បើទោះបីជានៅមានចំណុចមួយចំនួនត្រូវកែលម្អបន្ថែមក៏ដោយ
២. ភាគីចិននឹងពន្លឿនការរៀបចំរបាយការណ៍វាយតម្លៃនេះឱ្យបានលឿនបំផុតប្រកបដោយ លទ្ធផលល្អប្រសើរ។

May be an image of food and indoor

ភាគីចិនបានពិនិត្យឃើញនូវចំណុចខ្វះចន្លោះមួយចំនួនដែលតម្រូវឱ្យកែលម្អបន្ថែម ដូចខាងក្រោម៖
១. កែលម្អហេដ្ឋារចនាសម្ព័ន្ធដូចជា ការធ្វើខ័ណ្ឌចែកបន្ទប់វេចខ្ចប់ និងឃ្លាំងត្រជាក់ ហើយនិងត្រូវបន្ថែមឧបករណ៍មួយចំនួនទៀតនៅរោងចក្រប្រព្រឹត្តកម្ម ដើម្បីបង្កើន ការគ្រប់គ្រងអនាម័យ និងហានិភ័យបង្ករដោយសមាសភាពចង្រៃឱ្យកាន់តែមានប្រសិទ្ធភាពខ្ពស់
២. ត្រូវពង្រឹងវិធានការនានានៅក្នុងចម្ការ និងរោងចក្រដើម្បីទប់ស្កាត់ការរីករាលដាល ជំងឺកូវីដ-១៩ ឱ្យកាន់តែល្អប្រសើរ
៣. ពង្រឹងការយល់ដឹងបន្ថែមទៀតជូនទៅដល់អ្នកដាំស្វាយ និងម្ចាស់រោងចក្រប្រព្រឹត្តកម្មអំពីវិធានការ អនាម័យ និងភូតគាមអនាម័យឱ្យស្របតាមលក្ខខណ្ឌតម្រូវរបស់ភាគីចិន។

May be an image of fruit

ភាគីចិនសន្យានឹងផ្តល់លទ្ធផលតាមរយៈរបាយការណ៍វាយតម្លៃក្នុង រយៈពេល១សប្ដាហ៍បន្ទាប់ពីកិច្ចប្រជុំនេះ។ ក្រុមការងារអគ្គនាយកដ្ឋានកសិកម្ម នឹងខិតខំជំរុញ ឲ្យក្រុមហ៊ុន ធ្វើការកែលម្អនូវចំណុចខ្វះខាត ឱ្យបានលឿនបំផុត ដើម្បីឈានទៅសម្រេចឲ្យខានតែបានក្នុងការនាំចេញផ្លែស្វាយស្រស់ទៅកាន់ប្រទេសចិន នៅក្នុងឆ្នាំនេះ។

May be an image of fruit

សូមបញ្ជាក់ថា មូលហេតុចម្បងនៃការអូសបន្លាយពេលវេលា នៃការធ្វើសេចក្តីសម្រេចចិត្តក្នុងការអនុញ្ញាតឲ្យកម្ពុជានាំផ្លែស្វាយស្រស់ចេញពីកម្ពុជានោះ គឺ
១. ការយល់ដឹងរបស់កម្ពុជាទាក់ទងទៅនឹងការគ្រប់គ្រង អនាម័យនិងភូតគាមអនាម័យ (ទាំងការនាំចូលនិងនាំចេញផលិតផលកសិកម្ម និងទាំងការដាំដុះដំណាំ) នៅមានកម្រិត ដោយព្រះរាជាណាចក្រកម្ពុជាយើងពុំទាន់មានច្បាប់ស្តីពី អនាម័យនិងភូតគាមអនាម័យ នៅឡើយដែរ ។
២. ផ្លែស្វាយជាប្រភេទផ្លែឈើមួយដែលមានសក្តានុពល ផ្ទុកពងរុយ ដែលនឹងអាចចាប់ផ្តើមញស់ជាដង្កូវ ហើយក្លាយជាសត្វរុយ អាចទៅបំផ្លាញដំណាំនានានៅក្នុងប្រទេសនាំចូល ដែលមានភូមិសាស្រ្តស្ថិតនៅក្នុងតំបន់ មានស្ថានភាពនៃអាកាសធាតុ និងបរិស្ថាន ប្រហាក់ប្រហែលគ្នា៕

ចិនបានពិនិត្យឃើញនូវចំណុចខ្វះចន្លោះ ដែលតម្រូវឱ្យកែលម្អមុននាំផ្លែស្វាយស្រស់ចូលប្រទេស
299 Shares