ជីបម៉ុង គ្រុប បាននិងកំពុងពង្រីកវិសាលភាពរបស់ខ្លួនកាន់តែខ្លាំងឡើងៗ នៅក្នុងពិភពជំនួញនៅកម្ពុជា ហើយក្រុមហ៊ុននេះ ត្រូវបានមនុស្សភាគច្រើន មើលឃើញថាកំពុងក្តោបក្តាប់សេដ្ឋកិច្ចកម្ពុជាមួយផ្នែក។ ការចាត់ចំណាត់ថ្នាក់នេះគឺផ្អែកទៅលើសកម្មភាពវិនិយោគ និងការអភិវឌ្ឍយ៉ាងខ្លាំងខ្លារបស់ក្រុមហ៊ុននៅប៉ុន្មានឆ្នាំចុងក្រោយនេះ។
ហេតុអ្វី ជីបម៉ុង មានឥទ្ធិពលខ្លាំង ហើយមានសមត្ថភាពក្តោបក្តាប់សេដ្ឋកិច្ចកម្ពុជាបានស្ទើរទាំងស្រុង?
ចម្លើយគឺមើលទៅលើការបង់ពន្ធសព្វសារពើរបស់ក្រុមហ៊ុន ជីប ម៉ុង គ្រុប ចូលទៅរដ្ឋយ៉ាងច្រើនសន្ធឹកសន្ធាប់ ដើម្បីគាំទ្រដល់ដង្ហើមសេដ្ឋកិច្ចកម្ពុជាពីសំណាកក្រុមហ៊ុនយក្សមួយនេះ។ មិនតែប៉ុណ្ណោះ ជីប ម៉ុង បានផ្តល់និងបង្កើតការងារដល់ប្រជាជនក្នុងស្រុក និងក្រៅស្រុក រាប់ពាន់កន្លែង ដែលនេះជាផ្នែកមួយចូលរួមចំណែកយ៉ាងសកម្មសម្រាប់ការលើកស្ទួយ និងការអភិវឌ្ឍប្រទេសជាតិ។
ជីប ម៉ុង បាននាំមកនូវពាណិជ្ជកម្មជាច្រើនវិស័យដូចជា ការអភិវឌ្ឍលំនៅឋាន បេតុងលាយស្រេច ការចែកចាយ និងផលិតស៊ីម៉ងត៍ ការចែកចាយផលិតផលបរិភោគ ការផលិតស្រាបៀរ និងភេសជ្ជៈ។ល។ តាមរយៈសមត្ថភាព ការប្រកួតប្រជែង និងការចែកចាយទាន់ពេលវេលា ជាមួយបទដ្ឋានគុណភាពខ្ពស់បំផុត។
ហេតុអ្វី ជីបម៉ុង រឹងមាំឈរជើងបានយូរក្នុងពិភពជំនួញ?
ជីប ម៉ុង មានអ្នកដឹកនាំសុទ្ធតែជើងខ្លាំងដែលមានចំណេះ ជំនាញ ទេពកោសល្យ និងទស្សនវិស័យវិនិយោគវែងឆ្ងាយដ៏ជើងមេឃ។ ថ្នាក់ដឹកនាំកំពូលៗរបស់ក្រុមហ៊ុនទាំងអស់នោះ សុទ្ធសឹងតែកើតចេញមកពីចង្កោមគ្រួសារដែលមានដើមកំណើតនៅស្រុកស្រីសន្ធរ ខេត្តកំពង់ចាម គឺអ្នកឧកញ៉ា ភាព ហៀក ជាមាតា និងជាប្រធានក្រុមប្រឹក្សាភិបាលក្រុមហ៊ុន ជីប ម៉ុង គ្រុប ដោយមានសេនាធិការខ្លាំងៗដ៏មានឥទ្ធិពល ពីកូនប្រុស កូនស្រី របស់អ្នកឧកញ៉ា គឺអ្នកឧកញ៉ា លាង ឃុន ប្រធានអគ្គនាយកក្រុមហ៊ុន ជីប ម៉ុង អ្នកឧកញ៉ា លាង ម៉េង អគ្គនាយក ជីប ម៉ុង លោក ជំទាវ តែ សុវណ្ណី អគ្គនាយិកា ក្រុមហ៊ុន ជីប ម៉ុង ត្រេឌីង ឧកញ៉ា លាង ហួង (ហេនរី) អគ្គនាយកក្រុមហ៊ុន ជីប ម៉ុង លែន ឧកញ៉ា លាង ពៅ (ភីធើ) អគ្គនាយក ក្រុមហ៊ុនខ្មែរ ប៊ែវើរីជីស លោកជំទាវ គីម ចាន់ណា អគ្គនាយិការងជាន់ខ្ពស់ ជីប ម៉ុង គ្រុង និង លោកស្រី លី សុខឆេង នាយិកាទីផ្សារ និងវិភាគក្រុមហ៊ុន ខ្មែរប៊ែវើរីជីស។
ជីប ម៉ុង ទើបតែហក់មកប្រឡូកក្នុងវិស័យអចលនទ្រព្យសឹងក្រោយគេក្នុងចំណោមក្រុមហ៊ុនអភិវឌ្ឍអចលនទ្រព្យល្បីៗ ប៉ុន្តែទោះជាយ៉ាងណាក្តី គេសង្កេតឃើញថា ជីប ម៉ុង បាននិងកំពុងពង្រីកវិសាលភាពរបស់ខ្លួនកាន់តែធំឡើងៗ ទៅលើសកម្មភាពអភិវឌ្ឍន៍វិនិយោគគម្រោងលំនៅដ្ឋានបែបប្រណីតៗលំដាប់ខ្ពស់ ជាច្រើនកន្លែង។
ភាពជោគជ័យ និងការរីកចម្រើនដ៏អស្ចារ្យនេះ ក៏ក្រុមហ៊ុន ជីបម៉ុង គ្រុប មិនភ្លេចឡើយក្នុងការរួមចំណែកផ្តល់ជាវិភាគទានដល់ប្រជាជន និងរាជរដ្ឋាភិបាលកម្ពុជា នាពេលមានគ្រោះមហន្តរាយនិងវិបត្តិផ្សេងៗ។ ចាប់តាំងពីឆ្នាំ២០២០ ជីប ម៉ុង បរិច្ចាគជូនរដ្ឋាភិបាល ខ្ទង់លានដុល្លារ ម៉ាស់រាប់លានម៉ាស់ ទឹកបរិសុទ្ធ កម្ពុជា រាប់ម៉ឺនកេស និងផ្សព្វផ្សាយសារអប់រំអស់ថវិកាជាង១៥ម៉ឺនដុល្លារ ដើម្បីចូលរួមទប់ស្កាត់ការរីករាលដាលនៃវីរុសកូវីដ-១៩។
អ្នកឧកញ៉ា លាង ឃុន បានឲ្យដឹងថា ដើម្បីសម្រេចជោគជ័យនូវចក្ខុវិស័យនេះ ក្រុមហ៊ុនបានប្តេជ្ញាផលិត និងផ្តល់សេវាកម្មលំដាប់ថ្នាក់ពិភពលោកដែលជាជម្រើសទី១ សម្រាប់អតិថិជនដើម្បីឲ្យមានការរីកចម្រើនតាមរយៈការរួមបញ្ចូលគ្នានិងការទិញ ឬពហុជំនួញ និងនាំមុខទាំងការបង្កើត និងការអនុវត្តយុទ្ធសាស្ត្រប្រកបដោយនិរន្តរភាព៕
